Balei dei ban pynkylla noh ïa ka Reservation Policy ha Meghalaya

Ka Constitution jong ka Ri India Article 16 Clause 4(A) 4(B) ka shah ïa ki jylla lane State Government ban buh ïa ka Reservation Policy. Ban pyntreikam pat ka long katkum ka jingibit ka sorkar jylla ba la pynshong nongrim katkum ka jingdonkam ha la ki jylla jylla. Namarkata kadaw ba ki jylla ki ju pynkylla ïa ka Reservation katkum ka jingdonkam ha la ki jylla jong ki. Kum ka nuksa ka jylla Telangana ka la pynkylla na ka 6 p.c sha ka 10 p.c. ïa ki Tribal hangto bad la pynshong nongrim na ka jingbun briew (Population), khlem da ap ïa ka jingmynjur ka sorkar pdeng (Central Govt). Ka Sorkar Telangana tang hapoh 8 snem ka la pynkylla ïa ka Reservation Policy namar ki Tribal ki lah bun ban ïa kaba 8 snem mynshuwa.
Haba phai sha ka Meghalaya naduh u snem 1972 ka jingbun ki Khasi, Jaiñtia ha ka jylla ha ka lah tam lypa ban ïa ki Garo.
Katkum ka census 1981 ka jylla ka don baroh 1335819, na kane ki Khasi, Jaiñtia ki la long 829392 kaba long 62.09% na ka total ha ka jylla baroh kawei. Ki Garo pat ki don tang 506427 kaba long 37.91% na ka jingbun briew ha ka jylla.Ha u snem 1991 ruh katkum ka census ha ka jylla Meghalaya ka long 1774778. Khasi, Jaiñtia ki don 1105848 i.e., 62.31% na ka jylla, ki Garo pat tang 668930 kaba long 37.69% na ka jingbun briew ha ka jylla.
Kumjuh ha u snem 2011 ka jylla ka don 2966899 Khasi, Jaiñtia 186347 kaba mut 62.80% bad ki Garo tang 1103542 lane tang 37.20% na ka jingdon briew ha ka jylla. Namar kata naduh ba sdang ka jingbuh Reservation ha Meghalaya 40p.c Khasi Jaiñtia 40 pc Garo ka long ka bym shongnia ei ei.
La 50 snem tam ngi la shah, ka la dei ka por ba mynta ka sorkar Meghalaya kan pynheh noh ïa ngi ki Khasi -Jaiñtia namar wat ka sorkar India ruh kawei na ki daw ba kongsan ban ai reservation ïa ki Scheduled Caster Scheduled Tribe bad kiwei pat dei na ka census (Population). Namar kata ka shongnia bad shong hok ban pynkylla noh (Review) ïa ka Reservation Policy ha Meghalaya ban wanrah ïa ka jingbishar ba hok bad ba shisha.