Ba ym pat lah ban ñiew ïa ki vote, syier mynsiem ki paidbah angnud ban poi noh ka sngi ban ñiew ïa ki vote

Nongpoh, Rymphang 28: Kumba la sakhi ha kane ka kynti ka jingjied ïa kita ki nongmihkhmat ha Ri Bhoi District ka la dei kawei na ka election kaba la khluid bad kaba shongshit bha, ha kaba la sakhi ha man la ki jaka ki paidbah ki ïa khih mynsiem ban pynjop ïa la u kyrtong uba ki kyrshan na ki party bapher bapher kiba don ha Ri Bhoi District.
Haba khein kyllum ha Ri Bhoi District, na ki san tylli ki Constituency ki don haduh 35 ngut ki kyrtong kiba mih ban aireng ha kane ka election na ki party bapher baphher bad kynthup ruh ki kyrtong shimet bad kiba bun na ki paidbah ki la kwah ban tip noh mano napdeng kine ki kyrtong ki ban ioh khur ïa ka nam jop hadien ba ki paidbah ki la pyndep ïa kata ka kamram ban jied ïa kita ki nongmihkhmat kiba dei katkum ka jingpeit jingkhmih lane ka jingsngewbit jongki ban pynlong kum kita ki nongmihkhmat sha ka ïing Dobar thaw aiñ ka jylla.
Haba kren kyllum halor kane ka election 2023 na Ri Bhoi District, khlem da shah liang ïa uno uno u kyrtong ba aireng ha kane ka election, hynrei ki kyrtong kiba kham don jingkyrmen ban jop na ki san tylli ki constituency ki kynthup ïa ki kyrtong ka party UDP, NPP, Congress ba ka lyer ka kham beh jur bad ym lah pat ban tip kumno ki paidbah kin ai ai rai ha ka jingthep vote ha Ri Bhoi ka la ïaid beit ïaid ryntih khlem da don kano kano ka jingthud ne kiba ktah ïa ka shongsuk shongsaiñ ki paidbah.
Kumba la lum jingtip da u Nongthoh Khubor, Hooid, ka jingjied ïa ki nongmihkhmat ka la dep ba ki paidbah ki la ioh ïa kata ka hok ban jied ïa ki nongmihkhmat ba ki angnud, hynrei kane kam pat pynhun ïa ka mynsiem jong ki nongthep vote ba ka daw ka long ba ym pat lah ba ñiew ïa ki vote lane ban pynthikna mano na ki kyrtong kiba ki la dep ban kyrshan kin poi sha ka jingjop lane ban long kum uta u nongmihkhmat sha ka ïing Dorbar thaw aiñ ka jylla.
Haba kren ïa kane ka bynta, ym dei tang ki paidbah kiba la pyndep ban jied ïa kita ki nongmihkhmat kiba la khih mynsiem ban tip noh mano na ki kyrtong ban jop na kitei ki 5 tylli ki Constituency, hynrei ka jingbym pat lah ban ñiew ïa ki vote ka la pynkhih mynsiem khtam ïa ki kyrtong bad ki nongïalam kiba la trei shitom kumno ban ioh jingieid na ki paidbah lane ban pynpaw ïa la ki nongrim da ka jingthmu ban poi sha ka thong jong ka jingjop kaba ki angnud ban long kum kita ki nongmihkhmat paidbah.
Shuh shuh, khlem da jer ïa kino ki nongkyrshan jong ki kyrtong ne ki party bad baroh naduh ki kyrtong bad ki Nongïalam ryngkat ki paidbah nongkyrshan ki la ap khmih lynti bad ka la don ruh ka jingkhih mynsiem ban poi noh kata ka sngi ban ñiew ïa ki vote khnang ba ki paidbah kin tip ïano ki paidbah ki la ai rai ban long kita ki nongmihkhmat na ki san tylli ki Constituency ka Ri Bhoi ba kynthup ïa ka Umroi, Umsning, Mawhati, Jirang bad ka Nongpoh Constituency.