Ka NPP kan poi beit sha ka thong ban ïoh ïalam ïa ka jingsynshar ha ka jylla: Prestone
Shillong, Rymphang 28 : Wat la ki Exit Poll ki batai ba ka NPP kan jop hapdeng ka 20 haduh 26 ngut ki MLA hynrei na ka liang u Symbud Myntri Rangbah uba dei u National Vice President ka NPP u la ïathuh, kat haduh mynta ka sngi la ïoh jingkheiñ bad ïoh ruh ka khubor na ki tnad syntiat ba ka NPP kan poi beit sha ka thong ban ïoh ïalam ïa ka jingsynshar ha ka jylla.
“ Khlem pep ngin tam beit ïa u number 30 bad ngin ïoh beit ban synshar ha ka jylla ha kane ka kynti ba mynta. Kane ka pynpaw shai kdar ruh ba wat hapdeng ki jingshah kynnoh bad shah kynthoh ba shirynjaiñ ha ki social media, hynrei ki paidbah ki don ka jingshaniah ha ki nongïalam ka seng NPP” ong u bah Prestone.
U la ong shuh shuh wat la ki exit poll ki la batai lypa ïa ka jingjop jingrem hynrei kaba kongsan kan long beit ha ka 2 tarik kaba dei ka sngi ban pynbna ïa ka result.
Hooid bunsien kaei kaba ki lad pathai khubor ki leh ïa ka exit poll kam da don eh ka jingïapher kaba haduh katta katta haba la mih ka result hynrei to ngin ïa peit aiu kan jia na kine ki exit poll bad ka result ka ban mih ha katei ka 2 tarik.
Kat kum ki Exit Poll kaba la leh da ki kynhun bapher kum ka India Today-My Axis India, Zee News-Matrize bad Peoples Pulse-Big TV bad Times Now-ETG.
Katkum ka Peoples Pulse-Big TV Exit Poll: Ka NPP ka lah ban ïoh 17 – 26 seat, ka TMC kan 10 – 14 seat, UDP kan ïoh 8 – 12 seat, ka BJP kan ïoh 3 – 8 seat, ka Congress kan ïoh 3 – 5 seat, ka VPP 1 – 2 seat, ka PDF 1 – 2 seat, HSPDP 1 – 2 seat, ka GNC 0 – 1 seat bad kiwei kiwei 1 – 2 seat.
Katba ka Zee News-Matrize kala buh ba ka NPP kan jop 21-26 seat, ka BJP 6-11 seat, 8 – 13 ïa ka TMC bad 3-6 seat ïaka Congress bad 10-19 seat ia kiwei pat.
Ka India Today-My Axis India kala buh ba ka NPP kan jop 18-24 seat, ka Congress kan ïoh 6-12 seat, ka BJP kan ïoh 4-8 seats bad kiwei kiwei kin ioh 17-29 seat.
Na ka liang jong ka TimesNow-ETG kala buh ba ka NPP kan ïoh 18-26 seat, ka TMC bad ka UDP kin ïoh mar 8-14 seat bad 3-6 seat ïaka BJP bad ïa kaba tam yn leit sha kiwei pat ki seng saiñ pyrthei bad ki kyrtong shimet.