Ai khublei u Nongïalam ïa u DC bad SP ka Ri Bhoi ba ïaid beit ka jingthep vote ha khappud ka thaiñ

Nongpoh, Rymphang 28: Kum uwei na u nongïalam ki paidbah ha ka thaiñ Block II ha Ri Bhoi bad uba dei ruh u President ka Synjuk ki Rangbah Shnong Border Area jong ka Raid Nongtung ha Ri Bhoi District, u Bah Blikshon Sohtun mynta ka sngi u la ai khublei kyrpang ïa u Deputy Commissioner ka Ri Bhoi bad kumjuh ruh ïa u Superintendent of Police ka Ri Bhoi halor ka jingshim khia jongki ban wan rah ïa ka shongsuk shongsaiñ ki paidbah ha katei ka thaiñ Khappud ba ka jingjied ïa ki nongmihkhmat sha ka ïing Dorbar thaw aiñ ka jylla ka la ïaid beit ïaid ryntih khlem kino kino ki huri hura ba ki paidbah khappud ki la ioh lad ban pyndep ïa la hok ban jied ïa kita ki nongmihkhmat.
Kum ban pynpaw paidbah, u Bah Blishon Sohtun u la dei uwei na u riew rangbah bad u nongïalam uba la kit ïa ka khia ka shon bad ka bha ka miat ki paidbah jong ki paid Khasi ha ka thaiñ Block II ryngkat kiwei kiwei ki nongïalam bad ki riew rangbha ki la ju trei borbah ban wan rah ïa ka shongsuk shongsain ki paidbah bad ruh ka roi ka par ki paidbah ha ka thaiñ Block bad ha kane ka kynti ki la pynpaw pat ka jingsngewkmen ba ki paidbah katei ka thain khlem kano kano ka jingpynthud ki la ioh lad ban leit thep vote na ka bynta ban jied ïa kita ki nongmihkhmat sha ka ïing Dorbar thaw aiñ ka jylla Meghalaya.
Haba ïa kren bad ki Nongthoh Khubor, u Bah Blikshon Sohtun, President ka Synjuk ki Rangbah Shnong Border Area ka Raid Nongtung, u la ong ba kum u nongïalam u da pynpaw ka jingkmen halor ka jingkitkhlieh ka bor synshar District ha ka jingpeit jingkhmih u Deputy Commissioner, u Arpit Upadhaya bad u Superintendent of Police ka Ri Bhoi, u Giri Prasad bad dei lyngba ka jingshim khia jongki ban pynbiang ïa ki bor pahara ba ka jingjied nongmihkhmat ha kitei ki shnong khappud ki la ïaid beit ïaid ryntih khlem da don kano kano ka jingpynthud ïa ki paidbah kiba wan ban thep vote sha ki Polling Statino bapher bapher ba don ha katei ka thaiñ Block II ha Ri Bhoi District.
U la ong ruh kum ka synjuk naduh kaba sdang ki la shim khia ban ïa kren sha ki bor synshar District bad la dep ruh ban ai da ka jingthoh sha u Deputy Commissioner ka Ri Bhoi ban pynthikna ba ki paid nongthep vote na ka thaiñ Block II kim dei ban shah ktah ne shah pynthud bad ka long pat ka jingsngewkmen kaba khraw ba lyngba ka jingpynbiang ia ki bor pahara da ka ophis u Deputy Commissioner bad ka ophis u SP ka Ri Bhoi ka jingjied ïa kita ki nongmihkhmat ha ki shnong khappud ka Block II ka la long kaba jop bad ki paidbah ruh khlem kano kano ka jingshah pynbor ne pyntieng pynsmiej ki la ioh lad pyndep ïa kata ka kamram ban jied ïa kita ki nongmhkhmat khlem da thaw ïa uno uno u kyrtong jong ki political party.
“Ka synjuk ka kmen ruh ba naduh sdang ban ïa kren bad ban ai da ka jingthoh, u Deputy Commissioner ka Ri Bhoi ula dep ban kular ban pynbïang ïa ki bor pahara ban nym thud ka jingjied ïa ki nongmihkhmat bad kumba u la kular ka la urlong shisha ha kaba ki bor pahara kam dei satia tang na ka jylla Meghalaya bad wat ki bor pahara na Assam ruh ki don bynta lang ban peitngor ban nym don kano kano ka jingpynthud ïa ki paidbah ba wan thep vote” ong u Bah Blikshon Sohtun.
U la ïathuh ruh baroh ki shnong khappud naduh ka Shnong Sabuda, Jatalong, Umtlieh, Madan Umwang, umlaper bad kiwei kiwei ki shnong ki la ioh lad ba wan jied ïa kita ki nongmihkhmat bad la jin ba u Deputy Commissioner bad ka ophis u SP ka Ri Bhoi kim shim khia kin don shibun ki jingpynthud kiba ktah ïa ki paidbah ban wan thep vote ha kaba dang shen ruh uwei na u MLA na ka thain West Karbai Anglong u la maham lypa ba nym shah ïa ki paid khappud ban wan thep vote sha Meghalaya.
Namarkta, na ka laing ka Synjuk bad kum u nongïalam katei ka thaiñ ki ai ka burom kaba kyrpang ïa u Deputy Commissioner ka Ri Bhoi bad ruh ïa u SP ka Ri Bhoi halor kine ki jingshim khia jong ki ban wan rah ïa ka shongsuk shongsaiñ ha kane ka jingjied ïa kita ki nongmihkhmat bad kum ki nongïalam ki khmih lynti ruh ba kin dang shim ïa kata ka jingkitkhlieh ban wan rah ïa ka shongsuk shongsain nangne shakhmat bad ruh ban wan rah shibun ki kam pynroi kiba ai jingmyntoi na ka bynta ki paidbah ha kitei ki shnong khappud ka Block II ba dang ïa kajïa pud hapdeng ka Assam bad Meghalaya, u la bynrap.