Nongpoh, Naitung 21: Ka jingthud bad ka jinglip palat ka bording ha Ri Bhoi District ka la ktah shisha ha baroh ki liang na ka bynta ki paidbah kiba ju pyndonkam ïa ka bording ilektrik ha Ri Bhoi District.
Kane ka jinglip bording ha Ri Bhoi, ka dei kaba la kren bynniaw da baroh ki paidbah bad la sakhi ruh man ka por ym ju don kata ka por ba ka bording kan neh thikna, ha kaba jan man ki kynta ka bording ka shu lip bad teng teng da bun kynta ka bording kam ju poi satia kaba la buh jingeh shisha ïa ki paidbah.
Na ka liang ka Ri Bhoi Dorbar kum kawei na ka synjuk ki riew rangbah, kaba ju kren ïa ki jingeh ki paidbah ha Ri Bhoi, ka la pynpaw ka jingsngewkhia kaba jur halor kane ka jingthud palat ka bording ilektrik ha Ri Bhoi bad ka la pynpaw ruh ba la donkam ban shim khia ïa kane ka bynta ban ïa kren sha ki bor bahalor jong ka sorkar bad lada ka neh sah kumne ka long shisha ka jingduh-nong kaba khraw ïa ki paidbah ka Ri Bhoi.
Haba ïa kren sha ki lad pathai khubor, u Bah R.B Shadap, President ka Ri Bhoi Dorbar, u la ong ba ka Ri Bhoi Dorbar kum ka synjuk ki riew rangbah ka dap shisha da ka jingsngewkhia kaba jur, namar kane ka jinglip bad ka jingthud bording kam dei shuh ba la shu kren ne sngewkhia tang da ki riew paidbah bad la sakhi ruh da baroh ki paidbah ba kam ju don ka por kaba biang kata ka bording ilektrik.
U la ong ruh ha kum kane ka juk stad mynta jan baroh ki kam la hap ban pyndonkam da ka bording ilektrik bad ka jingthud ka bording ilektrik ka la pynduhnong shibun eh ïa ki paidbah. kaba kham sngewsih shuh shuh ka long ba wat lada ki paidbah kim ju ioh thikna ïa ka bording ilektrik, hynrei ha kaba kut jong u bnai pat ki hap ban siew thik thik ïa ka bai bording ilektrik, u la ong.
Na ka bynta ban weng ïa kane ka jingeh ki paidbah kaba dei na ka jingthud ka bording ilektrik, u Bah R.B Shadap, u ong, ka Ri Bhoi Dorbar shen kan sa ai noh da ka jingthoh sha u Deputy Commissioner ka Ri Bhoi, ki nongmihkhmat ka Ri Bhoi bad ruh sha u Myntri ba dei peit ïa ka tnad bording ban ïa kren halor kane ka jingeh ki paidbah, namar lada ka long sah kumne ka long shisha ka jingktah kaba jur ïa ki kam ki jam lada ym ioh thikna ïa kata ka bording ilektrik.
Shuh shuh, u la bynrap ruh da kaba ong ba ka Ri Bhoi Dorbar ka khot ka wer ïa ki paidbah, ki nongmihkhmat, ki seng bhalang bad baroh ki paidbah nongshong shnong ka Ri Bhoi ban ïa kyrshan lem halor kane ka phang, namar lada kum ki paidbah ki sangap jar kan long shisha ka jingktah kaba jur na kane ka jingthud bad ka jinglip bording ba ki paidbah ka Ri Bhoi ki la mad baroh shi katta, u la bynrap.
