Ba sahteng ïa ka jingpynbeit pud ha Langpih, ïakynduh ki nongïalam ka SNSHN ïa u DC

Nongstoiñ, K’lyngkot, 10: Ka jingkular ka sorkar ban pynbeit noh ïa u pud u sam bad ka jylla Assam ïa ka Langpih sector kam shym pat la urlong satia haduh mynta. Kumta ki nongïalam ka Synjuk Nongsynshar Shnong Hima Nongmynsaw mynta ka sngi balang ka 10 tarik Kyllalyngkot, ki la leit ban ïakynduh ïa u bah Garod L.S.N.Dykes IAS Deputy Commissioner ka West Khasi Hills, ban pynkynmaw ïa u lyngba ka jingthoh, ba un pyntip sha ka sorkar, ba ki paitbah jong katei ka thaiñ ki la kwah dik dik ba ka sorkar kan pyndep noh ha kaba pynbeit ïa u pud u sam ha ka Langpih sector.
U bah Serbilin Lyngdoh President ka Synjuk haba ïakren bad ki ladpathai khubor hadien ba ki la mih na kamra jong u Deputy Commissioner, u la ong ba naduh u snem ba la dep ka sorkar ka la ju kren na ka por sha ka por ba kan bthah ïa ki dkhot ka Regional Committee On Border Dispute kaba dei peit ïa ka West Khasi Hills.
Hynrei, haduh kine ki sngi ki dlkhot jong katei ka Committee ba la khlieh da u bah Paul Lyngdoh uba dei u Myntri Sorkar kim shym pat la wan ïuh kjat satia ha katei ka thaiñ.
Na ka liang ka Synjuk ki Nongsynshar shnong jong ka Hima Nongmynsaw Syiemship bad ki paitbah ki dap da ka jingsngewkhia bad ki shu sah ha ka umdum.
Utei u nongïalam ka Synjuk u la ong ruh ba na ka por sha ka por ki dkhot ka Regional Committee, ki la ju kren ha ki ladpathai khubor ba ïa ka jingpynbeit ïa u pud u sam ha ka Langpih sector, yn ïaleh ban pynkloi katba lah, hynrei ym tip na kaei ka daw ba katei ka kam ka dang sahteng haduh mynta.
Nalor kata u la ong ruh ba na ka liang u Deputy Commissioner, u la kular ba un sa pyntip sha ka sorkar ba ki paitbah jong ki shnong kiba don ha katei ka thaiñ khappud, ki la kwah haduh katta katta ban pynkloi ïa ka jingpynbeit ïa u pud u sam khnangba kan ym don shuh ka jingartatien ïa ki paitbah.
U la bynrap ruh ba wat la ha kine ki snem ka shongsuk shong saiñ ka la wanphai biang ha ki thaiñ Langpih. Hynrei, na ka liang ki paitbah nongshong shnong pat kim pat sngew thikna la ki shnong ki thaw jong ki kin shah kynthup ha poh West Khasi Hills ne kin shah khynñiat sha Assam. Kumta na ka liang ka Synjuk ka la kyntu jur ïa ka sorkar lyngba ka Regional Committee, ba kan pynkloi katba lah ban pynbeit noh ïa u pud u sam.