Ba leh torti ka NHAI shlei um bad ktieh ka surok ha Umskun, mar mar shimkhia ka NHAI mar sien jurip ki bor shnong

Nongpoh, Jymmang 22: Namar ka jingleh torti jong ki briew ka NHAI ban shna bha ïaki nala pyntuid um, kaba la buh jingeh ïaki paidbah ka thaiñ Umskun ban leit ban wan namar ka jingktieh bad ka jingdap um jong u surok, ki nongïalam shnong jong ka shnong Pahamrioh haka sngi Saitjaiñ ryngkat bad u Sirdar ka Elaka Nongpoh Sirdarship kila leit ban jurip syndon ïa kawei ka jaka ha katei ka shnong kaba shaid shlei um man ba hap slap.
Na ka liang u Bah Ronald Khongjoh Rangbah Shnong bad u Paiem Wanphrang Syiem Sirdar ka Elaka Nongpoh Sirdarship kila pynpaw ba ka daw bala pynlong ïaki ban leit jurip ka dei namar ka jingud jong ki paidbah ki shong ba sah sha katei ka thaiñ kiba ju mad jingeh man ka por ba hap slap naka jingshlei um bad ka jingktieh jong u surok bad shem jingeh wat tang ban ïaid khamtam ki khynnah skul kiba ju leit skul man ka sngi ki hap ban loit ïaki juti bad rah ïaki patlun shajrong ban lait naka ktieh.
Katei ka jingshlei um ha katei ka shnong kadei namar ka jingleh torti jong ka NHAI ba kam shym la pynbha ïaki nala tuid um bala pynlong ïa katei ka jaka ban lang um bad buh jingeh ïaki paidbah bad naka liang kitei ki shnong kila dawa ruh ban dei ban pynbha noh mardor ban weng ïaka jingeh jong ki paidbah.
Ki briew jong ka NHAI tang hadien katei ka jingleit jurip jong ki bor shnong kila shimkhia mar mar ban leit pynbha ïa katei ka surok bad la pyndap ruh da ki mawria haki bynta ba ktieh eh jong ka surok naka bynta ban pynsuk ïaka leit ka wan jong ki paidbah.