Punjab, Jymmang, 24: U Myntri Rangbah jong ka jylla Punjab u Bhagwant Mann, u la pyntreikam da ka hukum kaba tyngeh mynta ka sngi Baar pyrshah ïa u Myntri jong ka tnat ka Koit ka Khiah Vijah Singla uba la dawa bai sha shi persen ban pynïoh tender ïa kiba aplai na kane ka tnat.
Mar ïa shah sloit na ka shuki Myntri ki Pulit ki la kem ïa u Singla halor kane ka kam bamsap.
U Mann u ladep ïoh jingtip halor kane ka jingdawa bai sha jong une u Myntri Sorkar naduh shiphew sngi mynshwa bad kane jingshim rai pyrshah ïa u Singla ka long hadien ba u la wad ïa ka jingtip kaba bniah khnang ban pynthikna halor kane.
Kane ka sienjam kaba u Myntri Rangbah ka Jylla Punjab u la shim ka dei hadien ba uwei u shakri Sorkar jong ka tnat ka Koit ka Khiah u la mudui ha u Myntri Rangbah halor katei ka jingjia. Mar kumta, u Bhagwatt Mann ula ïaid beit shakhmat ban pynap shrip ïa u Singla da kaba bthah ban rekod ïa ki jingïakren ha kaba la pynshisha ba une u Myntri u donkti ban dawa ïa ka bai sha kaba shi persen.
“Wat tang shi persen ruh yn nym shah satia,” ong u Mann haba kren lyngba ka Video.
“U paidbah jong ka jylla Punjab ula jied ïa ka seng Aam Aadmi Party (AAP) da ka jingkhmihlynti ïa kaba bha bad ngi dei ban leh ruh kumta. Haba ka ri India ka la pynmih ïa ki khun jong ka, kum u Arvind Kejriwal bad u shipai kum u Bhagwant Mann kumta ka jingïakhun pyrshah ïa ka bamsap bampong kan ïaid shakhmat,” u la ong.
Shuh shuh u Mann u la kam ruh ba u Singla u la phla hi dalade halor ka jingdonkti jong u ban dawa pisa bai sha na ki nongthep Tender.
