Ap ka jingkyrduh um ïa ‘phew tylli ki shnong kiba don ïa ki tyllong u lum Mawthadraishan
Nongstoiñ, Risaw 3: U lum Mawthadraishan u dei u lynter lum u ba jrong tam ha West Khasi Hills bad naduh ki ranab haduh kliar jong utei u lynter lum, ki dap da ki pung bad ki tyllong um ki bym ju rngad baroh shi snem la ka dei ha ka por tlang ne lyiur. Ki don da ki phew tylli ki shnong kata naduh Parïong, Lawbyrtun, Mawkyllei, Umkrem, Domphetkhñiang, Mawkohngei, Nongshilong, Umjei, Mawroh, Markasa, Nongkasen, Laitkseh, Khyllem, Shophria, Umlieh, Mawlangkham, Ksehkohlong, Mawïawet, Nongdom bad kiwei iwei kiba don ïa ki tyllong umbam umdih ha utei u lynter lum.
Kaba isangsot ka long ba katba nang mih ki snem ki khlaw kiba jyrngam ha shilynter utei u lum, ki la nang synlen namar ka jingthnag rnga pathar bad lada katei ka jingthang rnga kan dang ïai bteng, ym don jingartatien ei ei ba baroh ki tyllong um bam kin sa tyrkhong lut. Haba poi ha kitei ki lynter lum ha kine ki sngi, la lap ba ka tdem na ki thliew thang rnga, kam ju jah baroh arphew saw kynta ka lyer kaba beh hir hir ha kliar jong kitei ki lum ka sma iwkhong bad haba peit ïa ki khlaw la isangsot.
Haba phai ha katei ka jingthang rnga pathar ha utei u lum, la I donkam haduh katta katta ba ka dei ka kamram jong u Syiem ka hima Myrïaw bad ka dorbar jong u ki la dei ban ïatai halor katei ka mat. Ym lah ban len ba ki trai jong ki jaka ba don kitei ki khlaw kiba la synlen, ki lah ban ong ba u Syiem bad ka dorbar hima kim don hok ban wan tuklar ïa ka khaw shimet jong ki. Hynrei lada kan jia ba ki tyllong umbam umdih jong ki phew tylli ki shnong bad ki phew hajar ngut ki nongshong shnong kin duh um, mano ban kitkhlieh.
Nalor kata ha kaba ïadei bad ka jingthang rnga pathar ym tang ha kitei ki jaka, hynrei ha ka District baroh kawei ym lah ban len ba ka dei, namar ka sorkar jylla ka la pynkheiñ im im peit peit ïa ka hukum kaba la pynmih da ka ïingbishar ba hakhlieh duh jong ka ri ka Supreme Court ba don burom bad hangne ka pyni shai kdar, ba ka jingkyrkait, ka jingpyrta shla ban pynneh pynsah ïa ka mariang da ka sorkar, ki sengbhalang bad ki khynnah skul man la u snem jong u bnai jylliew, ka dei tang ka kam kai bad ka buit poh jongno re.
Nalor kata ka sorkar ka ong ruh ba ka jingbret pathar ïa ki plastic bad kiwei kiwei ka pynjaboh ïa ka mariang, te hato ka tdem kaba mih na ki thliew rnga bad ka jingsynlen ki lum ka long kaba bha ne em.