Shillong, Nailur, 03: Ïa ka met jong kawei ka samla lud kaba la jah na la ïing na ka shnong Marbisu, la lap ha ka por shiteng sngi mynta ka Sngi Ba-ar ha kawei ka riat jong ka shnong Traw.
ïa kane ka met, la ïoh ban sei da ki Pulit na kane ka riat ha ka Sngi Baar.
Kane ka samla lud ka dei kaba la tip kyrteng kum ka Phibankyntiew Sun, 18 snem ka rta bad kaba dang pule ïa ka Class IX.
Katkum ka thymmei khubor ba la ïoh lum, la ïathuh ba ym shym la lah satia ban tip ïa ka daw jong ka jingïap kane ka samla ha kane ka riat, hynrei la shu lap tang ïa ka met ba ka la pyut.
Na ka daw ka jinglong sharing shaba palat jong ka riat, ïa kane ka met la ïoh ban sei ha ka shiteng sngi jong ka sngi Baar.
Kum ban shu pynkynmaw hangne, ka samla Phibankyntiew Sun bad u samla Wanboklang Kurbah, 20 snem ka rta ki la jah rngai na la ïing naduh ka 20 tarik, Nailur, 2023.
La ïohi khatduh ïa ki ha ka por kumba 5 baje janmiet ha ka shnong Marbisu.
Haduh mynta, ki bahaïing hasem bad ki paidbah ki dang pyrshang ban wad sa ïa u samla Wanboklang Kurbah uba dang jah rngai haduh mynta.
