Nongstoiñ, Risaw 16 : Ka jingsdang ban pur sted jong u drok ka la jur bha ha ka thaiñ jong ka West Khasi Hills District, kaba la wanrah ruh ka jingjot kaba shyrkhei ïa ki khun samla, kat haduh ba ka la pynduh thiah duh dem ïa ki kmie ki kpa kiba don ïa ki khun kiba la ngop ha kum utei u jingdih ba sniew.
Hynrei wat hapdeng ka jingsngewsih bad ka thma kaba jur ka don ruh ka jingkyrmen, namar don ruh ki khun samla kiba la ngop ha kum utei u jingdih, mynta ki la sdang ban kyndit bynriew kat haduh ba ki la nud ban mih shakhmat, ban phla ba ki kwah ban kylla noh bad ban ïoh ka jinglaitluid na ka jingshah teh mraw ha utei u jingdih.
Ha ka jingïakynduh jong u nongthoh khubor bad ki ar ngut ki samla kiba la angnud shisha ban kylla, ha kaba ki la ud la nam ruh ban ong don ne em kiba lah ban ai ka jingïarap ïa ki ban ïoh laitluid noh, namar ki la thrang eh bad babe ruh ïa kaei kaba ki la kum mad. Kitei ki ar ngut ki kynthup ïa u Middle Star Nongrum bad u Pyrkhatjanai Marbaniang kiba dei ki nongshong shnong ha sor Nongstoiñ.
Hato ka sorkar ne mano mano ruh ki riew shimet ki lah ne em ban wanrah ïa ka jaka ai jingsumar ne ka Rehabilitation Center, namar lada ki thmu ban leit shaduh sha sor Shillong ruh ki shem jingeh na ka daw ka jingduna ha ka ïoh ka kot.
Kitei ki samla ki la ong ba ki la ïohi bad lap ba don bun napdeng kiba ïadih lang, ki la kylla kiba jrong kti ne ban long ruh kum ki nongtuh namar ka jingbym ïoh pisa ban thied drok. Hynrei mynta ki la sdang ban kiew noh sha sor Shillong namar ym don lad shuh ban dang sah ha Nongstoiñ.
Ym tang katta hynrei ki la ong ruh ba lada kheiñ kyllum lang, baroh ki samla kiba la ngop ha ka jingdih drok ha ka thaiñ jong ka District, ki la kot kumba hajar ngut ei ei kynthup ïa kiba dang shu ngop shen kiba dei ki samla kiba dang sdang khie san ha ka karta.
“Bun ki ñiew beiñ bad kren sniew ïa ngi hynrei kam lei lei namar tang kita kiba la mad bad kiba don ki khun kiba la ngop ha une u jingdih ki sngewthuh”, ong kitei ki samla
Hadien ka jingïakren bad kitei ki arngut ki samla ban pynshisha la dang don ne em kiba thrang ban kylla na ka liang jong u nongthoh khubor, u la leit ban ïashem ruh bad ki katto katne ngut shuh shuh ki samla kiba la ngat ha kum utei u jingdih ba sniew.
Haba ïoh ban ïakren markhmat, kitei ki samla kiba la don lang kumba 6 ngut ei ei ki la ong ba ka dei ka jingshisha ba ki thrang bad kwah eh ban ïoh laitluid na u drok bad ki la ong ruh ba dang don shibun shuh shuh kiba angnud ïa ka jingkylla.
