Ai por shisngi ïa ka NHAI bad ka PWD ban pynpoi ïa ki kaiphod sha ka MLA Sutnga halor ka surok NH-6
Ka jingai por ki WS Narpuh bad ka KSU-NC ka la kut
![](https://mawphor.com/wp-content/uploads/2023/08/2-Copy.jpg)
Khliehriat, Nailar 03 : Ka MLA jong ka Sutnga Saipung Constituency mynta ka sngi ka la leit ban jurip biang ïa ka surok national highway -6 ha ka thaiñ Narpuh, kiba la leit jurip lang ha kane ka sngi ki kynthup u BDO jong ka Lumshnong C&RD Block, u Dr T.Shylla, u Executive Engineer jong ka tnat PWD Khliehriat, u bah M.Kharnaior ,u Superintendent Engineer PWD East Jaiñtia Hills District lem bad kiwei kiwei ki riew rangbah, na ka liang ka MLA, ka kong Santa Mary Shylla ka la ai da ka hukum kaba tyngeh ïa ka NHAI bad ïa ka tnat PWD ba ki dei ban pynpoi ïa ki kaiphot sha ka lashai ka sngi ka 4 tarik u nailar ha kaba ïadei bad kane ka jinglong jingman ka surok NH-6 ha East Jaiñtia Hills District.
Ka jingpan kaiphot katei ka MLA ka long halor ka nongrim ba u myntri ba dei peit ïa ki surok, lynti syngkieng un dup lah ban shim kam ban phah sha ka sorkar pdeng.
La ong ruh ba ka National Highway Authority of India ka dei ban siang rong thymmai lut ïa baroh shi lynter ka surok NH-6, kata tang shu kut kane ka aiom slap bad ïa mynta hi la nang pyndap shwa da ki maw ha kito ki jaka ba la thliew palat.
Na ka liang jong ka ruh kum ka nongmihkhmat ka la kubur ba ka surok ka la sniew shaba palat bad ka la buh jingeh shisha ïa ki paidbah nongleit nongwan kiba ïaid lyngba na kane ka surok NH-6 na East Jaiñtia Hills District, khamtam ha ka thaiñ Narpuh, na ka liang jong ka ka khmih lynti ba ïa kane ka surok yn sa maramot pynbha noh mardor.
kum ban shu pynkynmaw, ki Waheh Shnong jong ka thaiñ Narpuh bad ka Khasi Students Union Narpuh Circle, myn ha 26 tarik u bnai naitung 2023, ki la leit ban buh da ka jingthoh ha u Deputy Commissioner ka East Jaiñtia Hills District bad ki pynpaw ka jingsngew khia halor ka jinglong jingman ka surok National Highway-6 kaba naduh Mynkre shaduh Malidor kaba la jot la pra bad buh jingeh ïa ki paidbah, halor kane ki la ai por hynñiew sngi ïa ka sorkar bad ïa ka National Highway Authority of India ba maramot ïa katei ka surok, lym kumta ki Waheh Shnong bad ka KSU na Narpuh kin shim da kawei pat ka lynti bad kin khang lynti ïa ka surok national highway ha Narpuh, kane ka jing ai por ka la kut, ym lah ban tip kaei shuh shuh ka synjam ba ki Waheh Shnong ka Narpuh bad ka KSU Narpuh kin leh halor kane.
Ha ka shithi sha u Deputy Commissioner, ba la soi da ki Waheh Shnong na Narpuh bad ki nongïalam jong ka KSU Narpuh, ki pynrem jur ïa ka jingleh bym salia ka sorkar bad ka NHAI ka bym shim khia satia ban maramot ïa katei ka surok, ki la dawa ruh ba lada maramot ïa ka surok ym dei ban trei tang ban dep, hynrei dei ban da thep da ki maw ba heh, hadien pat sa thep sa ki maw kiba rit bad nangta pat sa siang rong bha ïa ka surok, dei ruh ban wanrah da ki engineer kiba la tbit bha ha ka kam shna surok, dei ruh ban pynbun ïa ki kor ki bor (machine) bad ki nongtrei ki ban trei, kumjuh ruh ka NHAI ka dei ban shim khia ban weng noh ïa ka jingeh jong ka jingtwa khyndew kaba ju jia ha ka tunel ha Sonapyrdi kaba ju buh jingeh ïa ki nongleit nongwan, kine ki long ki kyndon ba la buh ba ka NHAI ka dei ban bud.
Ki Waheh Shnong bad ka KSU na Narpuh, ki la byrngem ba lada ka NHAI kam bud ïa kitei ki kyndon ban maramot ïa ka surok, kin shim ïa ka synjam ban khang tala noh ïa ka jaka khrong pisa, Toll Gate, kin khang ïa ka lynti na ka surok national highway ha Narpuh bad ruh kin ujor da ka ejahar pyrshah ïa ka NHAI.
“Ngim lah shah shuh namar ngi la shah ban beiñ shaba palat pud, kane ka jingleh mynti ka sorkar bad ka NHAI ka pynbor ïa ngi ba ngi dei ban leh eiei bad mih shakhmat namar ngi pyrkhat ïa ki jingeh ba ki paidbah ki ïakynduh ha ka leit ka wan, lada ka sorkar bad ka NHAI kim leh eiei ngin shim noh da kawei pat ka synjam” pynpaw u bah K.S.Suchiang.
Kumjuh ruh u Waheh Shnong jong ka Thangskai, u bah Phabiang Syrti, u la ong ba ka jingsniew palat ka surok ka buh jingtieng bad jingsyier ïa ki paidbah kiba iaid ba ieng namar ki tieng ioh kylla ka kali ha surok namar ba ka surok ka la bun da ki thliew ba heh ba heh, u la kyrpad ïa ka sorkar bad ïa ka NHAI ba kin peit bad sngewthuh lem ïa ki jingeh jong ki paidbah kiba iaid lynti na kane ka surok national highway.