Shillong, Lber 14: U Nongïalam ka liang pyrshah u Mukul Sangma ha ka sngi Palei u la ai khublei ïa u Myntri Rangbah ka jylla u Conrad K Sangma ba u la ïoh da i khun shynrang.
“Nga kwah ban shim ïa kane ka kabu ban ai khublei ïa u Myntri Rangbah ka jylla ba u la ïoh ka jingshah kyrkhu kaba kyrpang da kaba ïoh ïa i khun shynrang ba dang shu kha thymmai,” ong u Mukul haba ïa shim bynta hapoh ka Dorbar mang tyngka ha ka sngi Palei.
U Myntri Rangbah barim ka jylla bad u nongïalam ka TMC u la ïathuh ruh ba ma u ruh u la ïoh i khun ksiew dang shen da kaba ong, “Kumta kine ki dei dak jingkyrkhu bad u Blei u la pyndep ïa ki jingkular na ka bynta ki bynriew ba kin pynroi ïa ka pyrthei.”
Ha kawei ka liang u nongïalam ka Voice of the People Party (VPP) u Bah Ardent Miller Basaiawmoit ruh u la ai ka jingkhublei ïa u Myntri Rangbah halor kane ka jingïoh jong u ïa i khun shynrang ba dang shu kha thymmai.
