Shillong, Lber, 26: Ka Ingbishar Meghalaya High Court ka la ai jingmut ïa ka Airports Authority of India (AAI) ban pynher liengsuiñ na Shillong sha Bhopal tang ha ki sngi Thohdieng bad ha ki sngi u Blei.
Ka Ingbishar ka la ai jingmut, na ka bynta ka bha ka miat jong ka ri, ka AAI ka dei ban pynthikna ba ka jingpynher liengsuiñ sha Bhopal na kiwei kiwei ki jylla kiba heh kum ka Chennai, Kerala, Kolkata, Guwahati, bad Shillong ha kine ki sngi.
Kane ka jingai jingmut ka long hadien ka jingpynsngew jong ki Nongbishar kiba ju leit khah khah sha Bhopal na ka bynta ki kam ki jam jong ka National Judicial Academy. Na ka jingbym don ka liengsuiñ, ki nongbishar bad ki ophisar ki hap ban leit na Guwahati sha Delhi bad kane ka pynslem kai tang ïa ka por leit por wan. Ka ingbishar ka la kdew, naduh ba la pyntreikam ïa ki liengsuiñ barit kaba kit 96 ngut ki nongleit jingleit kaba lah ban her na Shillong sha Delhi, kam dei ban don jingeh ban pyntreikam da kine kine kijuh ki liengsuin na ki jylla baheh lyngba ka Bhopal. Ka Ingbishar ka la kdew ruh ka jingdonkam jong ki kam jngohkai pyrthei ha Shillong bad ai jingmut ruh ba ka jingpynbun ïa ki liengsuiñ barit kan kyntiew ïa ki kam jngohkai pyrthei.
“Ka Bhopal ka dei ka nongbah jong ka Madhya Pradesh kaba long ka pdeng jong ka ri India. Sngewsih ba kam don ka liengsuiñ kaba pynher sha Bhopal. Kum ban shu ai nuksan, manla ka taiew ki Sitting Judge bad ki Judicial Officer ki hap ban leit sha Bhopal ban ïashim bynta ha ki kam jong ka National Judicial Academy bad ki jingïalang ki ju long manla ka sngi Saitjaiñ bad ha ka sngi u Blei,” ong ka Division Bench jong u Chief Justice S. Vaidyanathan bad u Justice W. Diengdoh.
Ka Ingbishr High Court ïa mynta ka la shong bishar ruh ïa ka jingujor ba ïadei bad ka jingpynheh ïa ka kad liengsuin Shillong Airport, kaba jngai tang shi kynta na nongbah Shillong. Ki nongbishar dang shen ki la leit jurip ïa ka jaka pynher liengsuiñ jong ka kad liengsuiñ Shillong Airport bad lap ba la donkam ban pynheh shuh shuh khnang ba yn dup lah ban pynher ïa ki leingsuiñ kiba heh kiba lah ban kit ïa ki nongleit jingleit ba palat 200 ngut.
Ki nongbishar ki la thmu ruh ban leit jngoh ïa kiwei pat ki liengsuiñ ha Bhutan, Leh bad ha Andaman and Nicobar Islands, ban lum jingtip shuh shuh halor ka rukom pynher liengsuiñ kaba lah ban leh ruh kumjuh ïa ka Shillong airport.
Ka Sorkar Jylla ka la pynpaw ïa ka mon ban bei ïa ka jinglut na ka bynta kane namarba ka kwah ban don ïa ka kad liengsuiñ kaba heh ha ka jylla ban khring ïa ki nongjngohkai pyrthei.
Ka Ingbishar ka ong ba ka khmihlynti ïa ka AAI ba kan shim ïa ki lad ki lynti ban pan jingmynjur na ka Ministry of Civil Aviation, New Delhi bad ban ïakren ruh bad ka Sorkar Bhutan khang ba ki nongbishar kin dup lah ban leit jngoh ïa ka Paro International Airport.
