Ai jingkyrshan u WS Kwator bad WS Pdeingwahkhrim ïa ka jingdawa u bah Marshal Biam ban maramot ïa ka surok ha khappud

Khliehriat, Nailar 28: Ki ar ngut ki waheh shong na ka thaiñ khappud, u waheh shnong Kwator, u bah Ebran Suchen bad Waheh Shnong Pdeingwahkhrim, bah Push Syrti, ki ai ka jingkyrshan ba pura ïa ka jingdawa u bah Marshal Biam, uba na dawa na u Engineer ka tnat PWD ban maramot noh ïa ka surok ha ka thaiñ khappud kaba naduh Lad Lakadong sha Borkhat, Natbor, Pdieng Wahkhriem, Demlakang Kwator shaduh ka shnong Hingaria, East Jaiñtia Hills District kaba la buh jingeh haduh katta katta ïa ki paidbah nongleit nongwan.
Na ka liang u bah Ebran Suchen, u la ong ba “ Ngi kum ki ar shnong na Kwator bad na Pdeingwahkhrim, ngi ai ka jingkyrshan ba pura ïa ka jingdawa u bah Marshall Biam, uba la dawa ban shna pynbha noh ïa ka surok ha kitei ki thaiñ khappud, kum ki nongshongshnong ngi mad jingeh ha ka leit ka wan khamtam haba wan lap ka pang ka shitom namar wat ki kali kit nongpang ruh kim lah ban poi sha shnong na ka daw ba sniew palat ka surok, kane ka ktah khamtam ïa ki longkmie ba ar met, ha ka por ba kha khyllung ki hap ban kha ha ïing, lada ngi ïaid na kane ka surok bunsien ki longkmie ba ar met ki kha noh ha lynti bad lada don ki tymmen kiba pang ruh, ngim nud shuh ban pynshong kali namar ngi tieng ioh kin khlad shiteng lynti namar ka jingsniew palat ka surok”
U bah E.Suchen u la ong ruh ba “Wat ki briew sorkar ruh haba ki wan donkam sha ki thaiñ jongngi ki hap ban wan da ki kali pickup lane ki kali gypsy” la ong ba kane ka surok ka dei kaba la shah ieh beiñ mynta la bun snem bad kum ki nongshomh shnong bunsien ki ju shah thok shah shukor ruh namar bun ki nongmihkhmat ki ju wan kular tang ha ka por election bad ynda la dep election kim patiaw shuh ïa kane ka surok, kumta ngi kyrpad ïa ka sorkar jylla ban shna pynbha noh mardor ïa kane ka surok bad ngi sngew sarong ba don kum une u samla rangbah u ba mih shakhmat ban khmih ïa ki jingeh ba khraw jong kane ka thaiñ jong ngi bad ngi kyrshan pura ïa u lada u donkam ïa ngi kum ki nongshong shnong jong ka thaiñ ha kino kino ki por ngi kloi ban mih shakhmat bad u” ong u kyrwoh.
Kum ban shu phai dien, u Bah Marshall SB Biam uwei na ki riew pawkhmat ka thaiñ East Jaiñtia Hills, myn ha ka 22 tarik mynta u bnai u la phah da ka jingujor sha ua Executive Engineer (EE) PWD (Rds), EJHD ha kaba iadei bad ka jingsniew ka surok ha katei ka thaiñ ha khappud
U la ong ba ha kine ki khyndiat bnai ba la dep la sakhi ïa ka jingther slap kaba la nangpynjulor shuh shuh ïa baroh ka shilynter jong ka surok kaba la dap satang da ki thliew ki syar, u la kyntu jur ïa ka Sorkar bad ka tnad ba dei khmih ba ki dei ban shim mardor ïa ki sienjam ban shna bad maramot ïa kane ka surok khlem da pynslem, bad lada ka sorkar kam shimkhia halor kane um banse ban shim da kiwei pat ki sienjam, ong u bah Marshal Biam.