Nongpoh, Kyllalyngkot 30: Ki khun samla na ka jaid bynriew Tiwa ha Ri Bhoi District na ka Shnong Amjong ki la mih shakhmat ban ai ka jingkyrshan ïa u kyrtong ka party BJP na Mawhati Constituency, u Dr. Evarist Myrsing, kaba dei halor ka jingangnud jong ki ba un jop bad ba un wan rah ïa ka jingkylla hapoh ka Mawhati Constituency bad ha ka jylla hi baroh kawei.
Ha ka sngi u Blei, ki samla Tiwa na ka Shnong Amjong ba hap ha ka Mawhati Constituency ki la mih paidbah ban ïa don ryngkat lang bad u kyrtong ka BJP ha ka Shnong Amjong na ka bynta ban pynpaw ba ki don kata ka mynsiem ban kyrshan ïa une u kyrtong na ka bynta ka jingkylla hapoh ka Constituency bad ha ka jylla hi baroh kawei.
Kum ki khun samla na ka jaid bynriew Tiwa kiba shong ba sah ha pud u sam ka Mawhati Constituency, da kawei ka jingmut ki la ïa mih lang ban ïa kynduh ïa u kyrtong ka BJP na Mawhati, u Dr. Evarist Myrsing bad kaei ka sur kaba ki la pynmih ka long ban ai ka jingkyrshan ïa une u kyrtong ka BJP ba un jop na Mawhati halor ka jingangnud ban wan ka jingkylla kumba ha ka ri India hi baroh kawei la synshar da ka party BJP.
U Samla Aniwel Hukait kum uwei na u nongïalam ki khun samla na ka Shnong Amjong, u la pynpaw da kaba ong ba ka daw kaba kum ki samla na ka jaid bynriew Tiwa ki phai khmat ban kyrshan ïa u kyrtong BJP, ka dei ka jingangnjud jongki ban wan ka jingkylla ha ka liang ka roi ka par bad ka ioh ka kot ha kaba ki ngeit ba dei tang ka party BJP kaba don ïa ka bor ha Delhi kan lah ban wan rah ka jingkylla ha ka jylla bad ka ri hi baroh kawei.
U la ong ruh ka daw kaba kum ki samla na ka jaid bynriew Tiwa ki kyrshan ïa u kyrtong ka BJP na Mawhati, ka dei ruh ba ki don ïa kata ka jingangnud ban pynneh pynsah ïa ka kolshor bad ka riti ka durtur jongki, namar u Dr. Evarist Myrsing u la dei uwei na u khun samla uba don ka jingiohi jngai bad uba don ruh ïa ka bor ban kit ïa ka lyngkor kum u nongïalam ban ïada kyrpang ïa ki riti ki dustur ym tang ïa ki paid Khasi bad Garo bad na ka bynta baroh ki jaid bynriew Riewlum kiba rit paid kiba don hapoh ka jylla Meghalaya, u la bynrap.
Shuh shuh, u la bynrap ruh ba ha kane ka kynti hi ki khun samla na ka jaid bynriew Tiwa kiba don hapoh ka Mawhati Consti tuency ki angnud ban pynjop ïa u kyrtong ka BJP, namar ka daw ka long ba kum ki jaid bynriew rit paid ki donkam ïa ka jingïada ba kyrpang namar ka BJP ka synshar ha ka ri, ha Assam bad lada ka ioh synshar leit ha Meghalaya kum ka party kan lah ban ïada kyrpang ne ban wan rah ïa ka jingkylla ha baroh ki liang, u la bynrap shuh shuh.
