Namar ka jingbym kheiñ snep da ki nongïalam, mih noh ki nongtrei ba hakhmat jong ka TMC ha Nongpoh

Nongpoh, Kyllalyngkot 30 : Ki Nongkitkam jong ka TMC Nongpoh Block kiba kynthup ïa u Samla Elianby Tynsong, Joint Secretary TMC Nongpoh Block, u Bah Emly Mangu Assistant Secretary TMC Nongpoh Block ha ryngkat ki nongbud nong synran jong ki, mynta ka sngi ki la wan shakhmat ban pynpaw sha ki paidbah ba kim treh shuh ban ïa don bynta bad ka Seng TMC namar ka jingbym kheiñ snep jong ki nongïalam kiba halor, ïaki kum ki nongkitkam jong ka Nongpoh Block.
Haba kren sha ki lad pathai khubor, naka liang u samla Elianby Tynsong uba bat ïaka kam kum u Joint Secretary jong ka TMC Nongpoh Block, u la ong, kane ka jingwan sha khmat ban kren sha ki paidbah lyngba ki lad pathai khubor ka long ban pynpaw paidbah ïaka jingthmu jong ki kum ki nongtrei jong ka TMC ba naduh ki la dep ban buh ïaka shithi resaiñ bad naduh kane ka sngi kim don bynta shuh bad ka seng TMC.
Shuh shuh u la ong ka daw bah kaba pynlong ïaki ban resaiñ noh naka party TMC ka long ruh halor ka jingai ticket jong ka TMC sha u bah Longsing Bey khlem da don kano kano ka jingïasyllok bad ki kum ki nongtrei kiba hakhmat, bad ka jingai ticket bad ka jingtrei jong une u ba shah tyrwa ticket ka la shu long beit nadien khlem da don ka jingtip na ki nongkitkam jong ka Nongpoh Block bad kane ka jingleh jong ki ka buh ïa ngi haka jingdum, ong u samla Elianby.
U la ong ruh, ba u la dep ban phah ïaka shithi resaiñ sha ki nongïalam ka party haka jylla, hynrei naka liang jong ki kim shem la pynsngew ne jubab eiei halor kane ka jingmih jong ki, bad dei halor kane ka daw ka pynlong ïaki ba kin wan sha ki lad pathai khubor ban pynpaw paidbah ïaka jingmih noh jong ki bad kim don bynta shuh ha ka TMC, u la bynrap.