Shillong, Risaw 27 : U Myntri ka Tnad Pule Puthi Rakkam A Sangma, ula kyntu ïa ka Voice of the People Party (VPP) kaba don ha ka Liang Pyrshah, ba kan ai ïa ki jingkynthoh kiba tei lem bad ki jingai jingmut ha ka jaka ban shu pynrem ne kynnoh beit.
U Myntri ula kynthoh ïa kane halor ka jingdawa jong ka VPP ïa u Myntri Rangbah ka Jylla Conrad K Sangma, ban weng noh ïa u Myntri ka tnad Pule Puthi na ka kam ba u bat.
Ka VPP kala thoh sha u Myntri Rangbah ka Jylla dang shen bad pynpaw ïa ka jingsngewkhia halor ka jingbym ïahap jong u Rakkam A Sangma ban bat ïa ka Tnad Pule Puthi haba kynnoh ruh ba une u Myntri um da tip satia shaphang ka Tnad ba u bat.
U Rakkam haba ïakren bad ki nongthoh khubor, ula ong “Ki (VPP) dei ki briew kiba la nang la stad, kumta ngi (Sorkar) khmih lynti ïa ki ym tang ban shu kynthoh hynrei ngi khmih lynti ba kin ai jingmut ruh. Baroh, la ki dei kiba don ha Liang Pyrshah ne ha ka Sorkar, ngi don ïa la ki jong ki jingkitkhlieh ha ka ban shakri bad noh synniang sha ki paidbah”.
qHa kajuh ka por, u Myntri ula pan ruh ïa ki jingai jingmut na ka VPP haba pynpaw ba kaei kaba ki pyni kan dei kaba kor, la ka dei halor ka kamram jong u kum u Myntri ne ïa ka Tnad Pule Puthi baroh kawei.
Haba mynjur ba ka Meghalaya ka dei ka ‘Jaka pdeng ka pule puthi” jong ka thaiñ Shatei Lam Mihngi, u Myntri ula pdiang sngewbha ïa ki jingnoh synniang ki stad ki jhad ba kynthup ïa ki academician, scholars, ka ban ai jingmyntoi shikatdei eh ïa ka Jylla.
U Myntri ula ban jur ba ka Sorkar Jylla bad ka Liang Pyrshah ki don ïa la ka kamram ba dei ban leh ha ka ban pynwandur bad kyntiew ïa ka Jylla.
