Shillong, Risaw 27 : Kawei ka kynhun trei mon sngewbha na Netherlands ba tip kum ka IORA – ACORN ka la kner kti ban treilang bad ka Khasi Hills Autonomous District Council na ka bynta ban pynjyngam ia ki khlaw ki btap bad ban plie lad ruh ia ki nongshong shnong ban ïeng ha la ki jong ki kjat.
Ia katei ka rai ban treilang bad katei ka kynhun na Netherlands la shim ha ka jingialang kaba long ha ka sngi Thohdieng ha KHADC ha kaba la donlang naduh u CEM ka Council Bah Pyniaid Syiem, Deputy CEM, Bah PN Syiem kynthup ia ki EM Kong Grace Kharpuri, Bah Fantin J Lakadong bad Kong Macdalyne Sawkmie Mawlong nalor kiwei kiwei.
Katba na ka sorkar jylla la donlang naduh u Dr. S, Ashutosh, IFS (Retd), Director & Co-Chairman, Centre of Excellence. Gunanka D B, IFS, Executive Director, MBDA, Dr. Lavinia M. Dkhar, Technical Specialist, Centre of Excellence bad ka kynhun na IORA-ACORN.
Haba kren bad ki lad pathai khubor u CEM u la iathuh ba ka bynta kaba ki Iatai ha katei ka jingialang kadei halor ka Agro Forestry Carbon Finance Project lane ka projek ban pynjyrngam ia ki khlaw ki btap bad kumjuh haba iadei bad ka rep ka riang.
“Hadien ka jingiatai ngi la rai ba na ka Forest Department ban thaw ia ka komiti ha kaba ka Executive Member ka tnad Forest in long i Chairperson bad ki CFO bad DCFO kum ki dkhot nalor ki heh sorkar jylla bad Centre of Excellence ban ia mir jingmut kiei ki jingdonkam bad kin sa wanrah ka ka Kaiphod ha ka EC ban iaid shakhmat ia ka kam,” u la ong.
U CEM u iathuh ruh ba watla na ka KHADC ki sngewtynnad ban iaid shakhmat ia ka kam hynrei ki kwah pat ban iatai sani shwa namar don ki bynta ba kongsan kiba hal ban ia kren.
Shwa kane, u la iathuh ba u la pyntip ruh ia katei ka kynhun na Netherlands ba ha Meghalaya kim donkam satia ban khnang pomdiemg namar ka jingkhein kor ia ki dieng ki siej ka la rung lypa ha ka jingmut jingpyrkhat ki nongshong shnong.
U ong ruh ba kane ka projek kan ai jingmyntoi ruh ia ki paidbah da ka jingwanrah ia ki buit treikam ba thymmai kiba tip kum ka carbon credit. U ong ruh ba kin lah ban ai jingiarap ia ki nongrep ba kin lah ban snohkti lang ha katei ka projek.
U CEM u la pyntip ruh ba katei ka kynhun na IORA – ACORN ka la dep leh bun ki projek ha India ban pynshlur ia ki paidbah ban thung dieng, ki dieng soh bad kiwei kiwei kiba iadei ban wanrah ka lyer kaba khuid ba suba nalor ba kan ai jingmyntoi ia ki paidbah.
