Ai jinghikai u Bah Jun Sing ïa ki nongdie doh ha Nongstoiñ

0

Nongstoiñ, Ïaiong 19: Ki nongdie bad nong ot doh ha Nongstoiñ ba kynthup naduh ki nongdie dohkha, ki nong ot doh masi, doh syiar bad kiwei kiwei ki la ïoh jingmyntoi shibun na ka jingai jinghikai jong u Bah Junsingh Warjri, hadien ba u la dep wanphai na ka jingleit shah pyntbit ha ka Krishi Vigyan Kendra kawei na ki tnad treikam ba la khmih bad pynïaid da ka ICAR u la shim ïa ka jingkitkhlieh ban pynsngewthuh bad hikai lem ïa kiwei pat ki para nong ot doh ha Nongstoiñ, khnang ba ka jingdie ïa ka doh bad kiwei kiwei ki mar bam kan long kaba khuid ba suba bad kaba lait na ki khñiang jingpang.
Ïa katei ka program ai jinghikai la pynlong ha khmat ki basa die doh syiar bad dohkha ha ka kyntoit Mawbyrshem bad la pynïaid ïa katei ka program ai jinghikai, da u Bah Nestingdar Nongdkhar rangbah dong jong ka kyntoit Mawbyrshem bad la wan ban ïashim bynta lang da ki nongdie doh kynthei bad shynrang.
U Bah Warjri u la dep batai bad pyni da ka nuksa ryngkat ki tiar ban pyndonkam la ïoh ruh ïa ka jingpynshai na u Bah Spingshon Marshra uwei na ki riew rangbah u ba la ju Islam lynti ïa ki nongrep bad u ba la ju ïa don bynta ha kiba bun ki program jong ka KVK.
U bah Marshra haba ai jingkren ha katei ka sngi, u la pynshai ba katei ka jingai jinghikai ka long ka bynta ba nyngkong eh ban wanrah ïa ka khuid jingsuba bad ba ki mar bam kum ka doh bad kiwei kiwei, kin lait na ka jingbit jong ki khñiang jingpang kiba pynsaphriang da ki skaiñ iong kiba boi.
U la ong ruh ba ka jingboi ki skaiñ iong ka dei kaba ma bha, namar ba ha ki kjat ki rah ïa ki khñiang jingpang kiba rit ki bym lah ban ïohi da ki khmat bad haba bam ïa ki jingbam ba ki la boi ki khñiang jingpang ki rung ha ka met u briew bad ki jingpang ba laiphew jait ki mih.

Leave A Reply

Your email address will not be published.