Shillong, Jylliew 30: Ka tnad pule ba ïadei bad ka kam aiñ, jong ka skul bah North Eastern Hills University ka la pynlong ia ka jingai jingpynshai ha kaba ïadei bad ki aiñ thymmai bad ïadei bad ki kam sniew ha ka sngi saitjaiñ ha ïing dorbar Mawkynroh.
Ha kane ka jingai jingpynshai kila don haduh 30 ngut ki nongkit kam shnong kiba la wan ban ïa shim bynta ban sngap ha kaba ïadei bad ki lai tylli ki aiñ thymmai kiba ïadei bad ki kam rumar, kumno ban tehlakam ïa ki kam sniew.
Ha kane ka jingïalang u Dr. A.K.Singh; Dr. R Sil bad Dr. Shishir Tiwari, na ka tnad pule aiñ ki la batai sha ki nongkitkam shnong kiba la wan ban ïashim bynta ïa ki kyndon treikam jong kane ka ain thymmai.
Ha kane ka sngi na ka liang u Bah Daiaman Langstang u la pynkylla ïa ka jingkren na ka ktien phareng sha ka ktien Khasi, u Dr. Shyamal Mandal bad katto katne ngut ki samla pule na ka skul bah kila ïa shim bynta lang ha katei ka jingpynshai paidbah.
Ïa kane ka jingïalang la pynïaid da u Bah Longshai Nongkhlaw, Rangbah shnong ka Mawkynroh Umshing, u bah Lassing Diengdoh, General Secretary ka shnong Mawkynroh Umshing u la don lang ha kane ka sngi.
