Shillong, Jylliew 29 : U Nongïalam ka NPP bad Myntri barim ka Sorkar u James K Sangma, ula pynpaw ba um don jingthmu ban mih aireng ha ka elekshon shiteng samoi ha ka Gambegre constituency.
Ha ka kyrwoh ba pyllait ha ka sngi saitjaiñ, u James ula ong “Ban pynshai ban pynbeit shisyndon ïa kane ka kam ba ngam don jingthmu satia ban ïakhun ïa ka elekshon shiteng samoi na Gambegre”.
“Ha ka jingialang jong ka party bad ki jingïakren, nga la pynshai ïa ka nongrim jong nga ruh” ula bynrap.
Ula kynthoh ïa kane halor ki khubor ba kynnoh ba ka don ka jingïapait ïapra hapoh ka Party bad ka ïing ka sem jong u, halor ka jingai ticket na ka bynta ka elekshon ha Gambegre.
“Kaba sngew lehraiñ ban ïohi ïa ki lad pathai khubor, katto katne kiba la jan kot 80 snem kan pynmih ïa ka jingthoh hakhmat duh bad ha ki social media khlem da pynthikna bad pynshai nangno ba ka ïoh ïa ka tyllong khubor” ula ong.
U James ula ong ba ym shym la don mano mano ruh ba phone ïa u ban kylli ïa kane ka kam bad ka long kaba kyndit ban ïohi ïa ka jingpynmih khubor ba ïalam bakla ha kane ka kot khubor tang na ki hamsaia.
