Shillong, Risaw 27: Kum shibynta ban pynkhreh ïa ka gymnasts na bynta ka Meghalaya Games ka ban sa long ha Tura ha u Kyllalyngkot, 2024, ka Meghalaya Gymnastics Association ka la ïoh ban pynlong ïa ka Coaching Camp ban ai jinghikai bad pyntbit ïa ki khynnah kiba thmu ban shimbynta ha kane ka rynsan ïalehkai.
ïa kane ka Coaching Camp la sdang naduh ka 21 tarik u Risaw bad la pynkut noh ha ka 24 tarik Risaw, 2023 bad ïa kane la pynlong ha S.A.I, Indoor hall ,NEHU Campus hapoh ka jingshahhikai jong u Gymnastics Coach, u Arjun Singh Khwairakpam, Dibrugarh Assam Coach bad ka Idalin Malngiang kum ka Assistant Coach.
Na ka liang jong ka MGA ka la pynpaw ïa ka jingsngew nguh ïa ki dkhot ka kynhun Meghalaya Gymnastics Association, khamtam ïa u Arjun bad ka Kong Ida, bad ruh ïa ki kmie ki kpa jong ki khynnah kiba la ïaid ryngkat ban ai kyrshan ïa ki khun ki ban sa shimbynta ha kane ka jingïalehkai gymnast.
ïa kane ka Coaching Camp la pynkut noh ryngkat ka put ka tem bad ka jingshad na ki khynnah ki ban shimbynta ha rynsan ïakop jong ka Meghalaya Games ka ban sa long ha u Kyllalyngkot, 2024.
