Jowai, Nailur 04: Ka Bouncers Association of Meghalaya (BAM) Jaiñtia Hills mynta ka sngi kala pynlong ïa ka prokram ai jinghikai ïa ki khynnah skul ka Jaiñtia Higher Secondary School (New Hills) Jowai ban long kiba don ka akor ka burom, khnang ban lait na ki kam sniew kiba ha rukom bad la batai ruh shaphang ka rukom treikam jong kane ka Association ban wanrah ïa ka bha ka miat ha ka imlang ka sahlang.
Ha kane ka sngi la ai jinghikai ruh ïa ki khynnah skul ba kim bit ban rah sha skul ïa kino kino ki tiar ïalehkai, ki mobile phone, ki kynja duma ba pynsniew ïa ka jingmut jingpyrkhat bad kiwei de, ha ka juh ka por la pynlong ruh ka jingjurip ïa ki khynnah skul da ki dkhot ka BAMJH ha ryngkat ka jingdonlang ka Principal jong ka skul ka kong Rihun Toi lem bad ki nonghikai.
La pynsngew da u President ka BAMJH samla Yoosar Kynjing ïa kane ka kynhun la seng ha ka 14 tarik u Nailur 2020 bad mynta sa tang shibnai kala dap 2 snem pura ka jingshakri ha ka imlang ka sahlang ban wanrah ïa ka bha ka miat bad ka jingshongsuk shong shngaiñ.
Shuh shuh ula ïathuh ba ka Association kumba long mynta hapoh ka District kala ïoh ka jingshañiah na kiba bun ki liang wat naduh ki bor pynïaid District kumjuh, wat ha ka por jong ka khlam Covid-19 ki dkhot ka BAM-JH kila mih shakhmat ban ïatreilang bad ki pulit ka District ban ïada na ka jingsaphriang jong kane ka jingpang.
U la ong ruh lyngba ka jingdon jong kane ka kynhuh BAM-JH kala long ruh kum ka lad ban plie lynti ïa ki khun samla ba kin ïoh kam ïoh jam ha kum kane ka juk bad mynta ki dkhot ka Association kila ïoh lad ban leit (duty) naduh ki Fate, ki Tamasa ba heh bad kiwei de.
‘Napdeng ki dkhot jong ka BAM-JH kila don haduh saw (4) ngut kiba la trei mynta ha Jaiñtia Higher Secondary School bad lai (3) ngut ha Govt. Boys Higher Secondary School ki ban ïarap ban peit ïa ka bha ka miat ki khynnah skul’.
Ha kane ka juh ka sngi ki nongïalam ba hakhmat jong ka Bouncers Association of Meghalaya (BAM) Jaiñtia Hills ha ryngkat ki dkhot jong ka Bouncers Association of Meghalaya (BAM) Shillong kiba kynthup ïa u Shan Syiemlieh, u Frandy Mynsong, u Denzil Hujun, u Rocky Rani bad u Edmund Myrthong kila wan ban pynthymmai ïa ki nongkitkam thymmai ka BAMJH haka jingïalang ba la pynlong ha phyllaw jong katei hi ka skul.
Kine ki nongkitkam ba thymmai ka BAMJH ki kynthup ïa u President samla Yoosar Kynjing, Vice President Ram Passah, General Secretary J.Lonel Passah, Asst. General Secretary Bakhrawkupar Sumer, Finance Secretary Forme Bina, Discipline Secretary Bnasan Shylla, Publicity Secretary u Wandame Hi Kynjing lem bad ki 7 ngut ki Executive Member.
Ha ka liang jong ka ‘Women Wing’ la jied President ïa ka Mariahunlang Dkhar, Vice President ka Rihok Shadap, General Secretary ka Corita Langbang, Asst. General Secretary ka Magdalina Phawa, Publicity Secretary ka Lasubon Shadap, Discipline Secretary ka Samhaka Dkhar, lem bad ki 7 ngut ki Executive Member na ka bynta Adviser la jied ïa u Iahmioo Khriem.
Ki dkhot jong ka Bouncers Association of Meghalaya (BAM) Shillong kila ai jinghikai (training) ruh ïa ki Member jong ka BAMJH halor kumno ban pynlong ïa ka rukom talasi (Checking) ha ki jaka bala mana ban rah ïa ki tiar pynmynsaw bad ki jait jingdih pynbuaid, ka rukom pynsngewthuh ïa ki paidbah naduh ka rukom kren lada mih kino kino ki jingklumar bad kiwei de.
La ai jinghikai ruh kum ki dkhot ka BAM ki dei ban long kiba don ka akor ka burom ha ka por ba don ha ki Uniform kin kiar na ki jingdih duma ne pynmih ïa ki kyntien ba sniew bad kim dei ban pyndonkam bakla ïa ki ID ha kino kino ki kam shimet.
Hadien kane ka BAMJH ka la ïoh lad ruh ban ïalam ïa ki khynnah skul halor kumno ban pyndonkam ïa ki lynti ïaidkjat bad ban pyndonkam ïa ki Zebra Crossing ha ka por ka jam na shilliang sha shilliang ka surok.
La pyntip ba ka BAMJH hapoh ka jingïalam u President kan sa bteng ban pynlong ïa kane ka juh ka prokram ai jinghikai ïa ki khynnah ha ki skul bapher bapher kiba don hapoh ka sor Jowai.
