Shaduh ïingbishar yn ïakhun pyrshah lada duhei ki jaka na jingker sainar shiah: Secretary CCIB

Jowai, K’lyngkot 28 : U General Secretary ka Co-Ordination Committee on International Border (CCIB) ma Kmen Myrchiang haba kren sha ki lad pathai khubor hynnin ka sngi 27 tarik ha Border Security Force BOP Jaliakhola, West Jaiñtia Hills District, ula kren shai kum ki trai jaka lada ki duh noh ei ïa ki jaka rep naka jingker sainar shiah kim banse ban ujor shaduh ka ïing bishar ba don burom pyrshah ïa ka sorkar.
Ula ong ba ka CCIB ka ïeng haka nongrim ym ban pyrshah ïa ka jingker sainar shiah hynrei ki pyrshah ïaka rukom shim jaka ka sorkar, kaba la leh da ka jingbymtip jong ki trai jaka bad kane kala ktah ïa ki jaka rep haduh shi kilo miter eiei na u pilar.
‘La 25 snem mynta ki kwah ba ka sorkar kan sngap ïa ka jingeh jong ki kum ki trai jaka bad haka jingshisha katkum ka jingtip ïa u pud u sam ba mynta u dang dei tang u Temporary’, ong u ma Kmen Myrchiang.
Shuh shuh ula ong shisien bala ker ïa ka (fencing) la tikna ba ki trai jaka kin duh noh ïa ki jaka rep jong ki kiba don shabar na ka fencing, wat na ka liang ka sorkar ula pynsngew ba ka jingsiew (compensation) ka long tang 11 miter (8 miter ïa ka surok bad 3 miter ïa ka fencing) kumta kane ka jingpyrshah jong ki kala ïaid da ki phew snem bad haduh mynta kam pat seisoh.
U ma Kmen Myrchiang ula ong wat naka liang u Myntri Rangbah ka jylla ba mynta u Conrad K. Sangma ula dep kular bad shimkhia ïa kane haka por ba u dang long MP bad ban ïakren sha Delhi, hynrei haduh mynta kam shem urlong wad tang ban leit ïa kynduh bad u ruh kim shem ïohlad satia.
Naka liang ka CCIB ka kwah ba ka sorkar kan khot ïakren noh mardor bad ban pynlong daka jingpynsngewthuh paidbah ïa kane ka jingthmu ker sainar, khnang ba ki trai jaka bad ki nongrep kin ïoh ïashim bynta lang.
Ula kynthoh jur halor ka jingkam u Myntri Rangbah ba ka sorkar jong u kala trei shitom ban pyndep ïa kane ka jingker sainar shiah ha khappud bad kane ka paw ba ka sorkar ka kwah tang ban pyndep ïa ka jingker sainar, katba ki paidbah ai kin ïap na ka jingduh ïa ki jaka rep kiba juh pyndap bam ïa ki.
“Kum u Myntri Rangbah um dei ban kren tang haka shuki, hynrei u dei ban wan khnang dalade ha kane ka jaka, khnang ban ïohi da ki khmat la jong ïaka jingeh u paidbah nongshong shnong na ka jingduh jong ki ei ïa ki jaka rep na ka daw ka jingker sainar shiah.