Da ka jingtrei shitom ki nongkitkam shnong, kiew ka Riatsamthiah ha kiba bun ki liang: Bah Khlainbor

Shillong, K’ Lyngkot 27: Kum ka dak ka jingïashim bynta lang bad ka ri baroh kawei bad kumjuh ruh ban bteng ïa ka kam kaba la sdang naduh u snem 2023, ka Dorbar Shnong Riatsamthiah ka la rakhe lang ïa ka Republic Day kaba 77 ha une u snem kaba long kum ka dak ba la ïoh ïa ka riti synshar jong ka ri naduh ka 26 tarik Kyllalyngkot 1950.
Ha kane ka prokram la kyntiew ïa ka lama lai rong ka ri da u kongsan uba dei ruh u tymmen basan u Bah Khlainbor Lyngdoh ha ka jingdonlang u Rangbah Shnong Bah M Kharkrang ki nongkitkam shnong bad ki Rangbah bad nongïalam shnong jong ki shnong ba marjan.
Haba kren ha ka jingïalang u Bah Lyngdoh u la ong ba ka shnong Riatsamthiah naduh ki snem kiba mynshwa kadei ka shnong kaba don ka jingïatylli bad ka jingïalong kawei. U la pynpaw ruh ka jingkmen ba ka shnong naduh ki por kiba mynshwa ka don hapdeng ka shongsuk shongsaiñ bad bym ju don kano kano ka jingkulmar.
“La kadei ha ki kam ïalehkai bad kiwei kiwei ka shnong ka la paw bha bad da ka jingdon ka Riatsamthiah Sports Club ka la nang kyntiew ïa ki khun samla ka shnong kiba don ha ki sap bapher bapher, kane baroh dei ban ai burom ïa ka jingtrei borbah jong ki nongkitkam shnong naduh ki snem kiba mynshwa bad kumjuh ruh ki nongkitkam shnong jong kane ka samoi treikam kaba mynta hapoh ka jingïalam jong u Mariahom Kharkrang bad ka kynhun treikam jong u,” bynrap u Bah Lyngdoh. Kum u kongsan haba kren u la pynpaw ïa ka jingkongsan jong ka jingïalong kawei.
U la ong ba naduh mynshwa la ïohi ïa ka jingïatylli, ka jingïalong shi ïing khlem da peit ïa ka jingngeit hapoh ka shnong Riatsamthiah.
U la ong ruh ba ka shnong ka don barabor hapdeng ka shongsuk shongshngaiñ bad kine baroh dei na ka jinglah ki nongkitkam shnong naduh ki snem kiba mynshwa, bad kumta u la pynpaw ka jingkyrmen ba kane ka mynsiem ïatreilang kan dang ïaibteng na ka bynta ban wanrah nam bad burom ïa ka shnong baroh kawei.
Ha kane ka sngi ka dorbar shnong ka la pynkup burom ruh ïa ki nongtrei ka tnat Urban Affairs bad ka Shillong Municipal Board da kaba ai ïa ki momento kum ka dak ka jingburom ba ki la wanrah ïa kiba bun ki kam Pynroi ha ka shnong na ka bynta ka snem 2025 haduh 2026.
Ka jingthmu kane ka program ka long ban pynrung ha ki nongshong shnong ïa ka mynsiem ieid ri, nangta ka jingïalong kawei, khamtam ha ki khun samla ka shnong.
La pynïaid ïa ka prokram da u secretary shnong Bah Indra Syiemlieh la ïoh ka jingrwai national anthem na ki samla bad la ïoh ki kyntien ai khublei na u Assistant Secretary Bah Jonathan Suchiang bad kiwei kiwei pat ki prokram.