K a jingpynbna jong u Lat ka jylla u CH Vijayashankar ha ka jingrakhe ïa ka Republic Day kaba 77 ha Polo ba ka jylla Meghalaya ka wan ba ar ha India ha ka jingkiew sted namar kaba nyngkong ka dei ka Tamil Nadu. U la kren ïa kane da kaba pynshong nongrim na ka GSDP jongka jylla kaba long 9.66 % kaba la neh mynta kumba 10 % la lai snem kynthih kata hadien ka khlam COVID-19. Ka long kaei kaei kaba dei ban sngewsarong ba ka jylla ka la nang kiew sted napdeng kiwei ki jylla jongka ri India.
Kane ka jingkiewsted khlem pep kan poi ruh sha kata ka thong ba la buh da kane ka sorkar MDA ba kat haduh u 2032 ka ïoh ka kot jongka jylla kan long sha ka 16 billion dollar bad kane ka dei lyngba kata ka Mission 10 kaba la sdang naduh u 2022. Ym lah ban len kine kiei kiei baroh ki dei ki jingtrei shitom jong u Myntri Rangbah u Conrad K Sangma bad ka Kynhun jongu kumjuh ruh ki ophisar jongka sorkar namar khlem ka jingïatreilang da buh kita ki thong treikam ruh kam poi shano shano ruh.
Ha kaba sdang ïa kane ka Mission 10 ka ïoh ka kot ka jylla ka long tang 5 billion dollar. Hynrei na ka jingïaid lynti la khmih lynti ba kan kot sha ka 10 bilion dollar ha u 2028 bad lada poi sha kane ka thong khlem pep ha u 2032 kan poi beit sha ka thong ba 16 billion dollar. Kane ka Mission 10 ka dei halor ka nongrim jong ki 10 tylli ki mat treikam ki ban kyntiew ïa ka GSDP jongka jylla.
Kawei na ki daw ba ka jylla ka kiew ka dei namar ba ka shongsuk shongsaiñ ruh ka la wan phai ha kine ki khyndiat snem. Ki briew ki la sdang ban nud ban wan sengkam ha kane ka jylla bad kane hi ka khring ïa ki briew ban kwah ban jngoh ïa ka jylla bad ym lah ruh ban len ka kam jngohkai ka dei kawei na ki lad ki lynti ba kyntiew bha ïa ka jylla Meghalaya namar da ki hajar ngut ki briew ki im ja na ka kam jngohkai pyrthei kumba long mynta.
Haba don kino kino ki jingïakynad ka sorkar ruh ka kloi ban tem ïa ki da kaba khot ïakren ne lada dei ban phah pynkhlaiñ da ki bor pahara kum ha ki bynta khappud. Kane ka la pynlong ïa kino kino ki jingïakynad ba kin ym ïoh ban kha roi bad pur sted namar ka jingsted jong ka sorkar ban tem ïa kino kino ki jingïapher jingmut. Kaei kaba kongsan ka long ban pyndep noh ka jingïapynbeit pud hapdeng ka Assam bad Meghalaya khnang ba ka shongsuk shongsaiñ ba ïaineh shirta kan bteng ha khappud.
Ha kaba ïadei bad ki bynta khappud bad ka Bangladesh la ïohi ba ka sorkar ka la rai ban pynkhlaiñ da ki VDP khnang ba ki mynder kin ym ïoh lad ban rung sha u pud u sam ka jylla. Namar lada ki VDP ki khlaiñ yn ym don mynder ne kiwei ki jaidbynriew ban ïoh rung ha ki shnong ki thaw ban rieh tngen namar kham tip shuh shuh ki VDP uno u trai shnong bad uno u bym dei trai shnong.
Nalor kata ka sorkar ka la pyntreikam ruh \ïakiba bun ki skhim na ka bynta ban kyntiew ïa ka ïoh ka kot bad ka ïoh kam ïoh jam jong ki khun samla. Kawei kaba wanrah ka jingkiew jingroi bad jingshong suk shongsaiñ ka dei ka jingïoh kam ïoh jam ki khun samla kam pher lada kim ïoh ïa kata ka kam sorkar ruh hynrei haba ka sorkar ka ïarap ba kin ïeng ha la ki jong ki kjat ki khun samla jongngi ruh ki kloi bad ki kham sngewtynnad ban trei hi ïa ka kam lajong ban ïa kaba treikam sorkar. Kane ka juk mynta ka la kylla, mynshwa ki khun samla ki ïabeh beit tang ha ka kam sorkar hynrei mynta ki la sdang ban phai sha ka kam lajong bad lada kane ka ïai bteng kan sa poi ka por ba ka sorkar kan hap ban pynbor ïa ki khun samla ba kin treikam sorkar.
Kane keiñ kaba ngi kwah ban ïohi ynda ka jylla ka la kot sha kata ka 16 billion dollar ha ka liang ka ïoh ka kot.
