Dei ban thung da ka Kynhun ba Kyrpang ban wanrah biang ïa ka shongsuk ha rilum Garo ong ki Seng Bhalang

Shillong, Kyllalyngkot 23 : Ki Seng Bhalang na ri lum Garo ki la ai jingmut sha u Myntri Rangbah ka jylla u Conrad K Sangma ïa ka jingdonkam ban thung noh da ka Kynhun ba Kyrpang ka ban kynthup ïa ki Nongmihkhmat na baroh ki tnad sorkar ki ban ïatrei lang ban wanrah ïa ka jingshongsuk shongsaiñ ha ri lum Garo namar kumba long mynta hadien ka jingshah pyniap u dkhot ka ACHIK u Dilseng M Sangma ha ka 9 tarik mynta u bnai, ka don ka jingkyan kaba shyrkhei bha napoh napoh pyrshah ïa ki jaidbynriew bar jylla.
Kine ki Seng Bhalang kiba la ai jingthoh sha u Myntri Rangbah ki kynthup ïa ka ADE,APEX Committee, AYWO, FFAF, FKJGP bad GSU. Kine ki la pynpaw ka jingsngewkhia jur halor kane ka jingkyan jingkynad hapdeng ki trai ri trai muluk bad ki bym dei trai ri trai muluk ha ri lum Garo. Ki la ong ba kane ka dei namar ka jingbym khlaiñ ki bor synshar, ka jingïoh rung laitlan kiwei ki jaidbynriew sha ri lum Garo bad khamtam ka jingbym lah ban khanglad ïa ki kam beaiñ kum ka jingkhaïi maw beaiï bad dieng sawdong beaiñ lyngba ka khappud Bangladesh.
“ Kano kao ka jingïoh rung beaiñ shapoh u pud u sam ka jylla ka dei ka jingma ïa ki jaidbynriew trai ri trai muluk , kumta ka donkam ka jingïatrei lang kaba khlaiñ hapdeng ki tnad sorkar bapher bapher khamtam bad ki briew jongka aiñ ban lah tehlakam ïa kine ki jingïoh rung beaiñ” ong ki Seng Bhalang ha ka shithi sha u Myntri Rangbah.
Ki la ong ka por ka dawa ban don ka kynhun ba kyrpang ka ban ïatrei lang da baroh ki tnad sorkar ban rat dyngkong ïa kino kino ki kam beaiñ. Kane ka kynhun ba khlaiñ ka dei ban long hapdeng ka tnad Land and Revenue, Home Department, District Council Affairs Department, Forest and Environment Department , Autonomous District Councils, Ki bor synshar District bad ki bor Pulit.
Da ka jingïatrei lang kine ki tnad sorkar kin lah ban khanglad ïakino kino ki kam beaiñ ha kano kano ka por bad da kane ka kynhun ka lah ban wanrah ïa ka jingshong suk shongsaiñ khamtam eh ka jingïasngewthuh jingmut hapdeng ki trai ri trai muluk bad ki bym dei trai ri trai muluk ruh.
Nalor kane kine ki seng bhalang ki kyntu ruh ïa ka sorkar ban buh ïa ka kynhun pulit kaba khlaiñ ha ki jaka thor ka ri lum Garo. “ Ngi ïohi kumno ka jinglong jingman ha katei ka jaka thor jongka ri lum Garo ka don hapdeng ka jingkyan jingkynad kaba shyrkhei bha ba lada bakla tang khyndiat ka lah ban jia ka jingklang jongka ding ba shyrkhei. Lada kane ka ïohlad ban jia ka long kaba eh ban tem ïa ka namar wei ba la bthei lada ym don ki bor pulit kiba khlaiñ kan long kaba eh ban tem. Kumta ka sorkar ka dei ban buh ïa ka kynhun pulit kaba khlaiñ ha katei ka jaka namar ym tip kaei ka ban jia hapdeng ki ar jaitbynriew” ong biang ki Seng Bhalang.
Ki Seng Bhalang ki dawa ruh ba ka sorkar ka dei ban siew 10 lak tyngka kum ka bai lutksan sha ka long ïing u Dilseng bad ban bthah ruh ïa ka Special Investigation Team (SIT) ban tohkit bniah halor ka jingshah pyniap u Dilseng. Ki Seng Bhalang ki pypaw ka jingsngewnguh ïa ka sorkar kaba la shim khia ban thung kloi ïa ka SIT ban tohkit halor kane ka jingjia.