Amlarem, K’Lyngkot 23: Ka ophis Sub-Divisional Officer (Election), Amlarem Sub-Division West Jaiñtia Hills District ka la rakhe ïa ka 16th National Voters’ Day (NVD) mynta ka sngi 23 tarik u Kyllalyngkot, 2026 ha Conference Hall, SDO (Civil) Office, Amlarem halor ka phang “My India, My Vote”.
Shi bynta na kane ka jingrakhe la pynlong ïa ka “Run for Democracy” ha ka por 6 baje mynstep bad la wan ban ïashim bynta da ki 43 ngut ki nongmareh ha ki rta bapher bapher. Katba ïa ka jingïakop Painting Competition bad thoh Essay la pynlong ha shwa jong kane ka sngi da ka jingïashim bynta shitrhem jong ki samla pule bad ki paidbah nongshong shnong ka thaiñ.
Ïa ka jingïalang ha kane ka sngi la pynïaid da ka Dr. Kavery Rabha, MCS, Assistant Commissioner, kaba la pdiang sngewbha ïa baroh bad lamkhmat ïa ka Voters’ Pledge kum ka dak ban don ka jingkitkhlieh kum ki nongthep vote.
Na ka liang ka kongsan ka Kong Vevotolu Kezo, IAS, Sub-Divisional Officer (Election), Amlarem, ha ka jingkren ka la ban jur halor ka bor jong ka synshar paidbah bad kane ka bor kam shong tang ha ki ophis treikam ne ki kynhun hynrei ka shong ha ka jingïashim bynta jong u paidbah nongshong shnong, ha ka juh ka por ka la kyntu ïa baroh kiba don vote ba kin shim bynta ha ka elekshon.
Kiwei kiba ai jingkren ki long u Sony Suting, BLO bad u ma Browel Sumer, BLO Supervisor, kiba la kren halor ka bynta kaba kongsan jong ki Booth Level Officers bad ka rukom pynsngewthuh paidbah halor ka jingdonkam jong ka synshar paidbah bad khamtam eh ïa ki samla kiba long first-time voters.
La sam ruh ïa ki EPIC Cards sha ki nongthep vote ba thymmai bad hadien kane la sam ïa ki khusnam sha ki nongjop ha ka Run for Democracy, Painting bad Essay Writing Competition.
Ha ka Run for Democracy ki nongjop ha ka kyrdan Sub-Junior (Boys) haduh 14 snem la wan ba nyngkong 1st da u Kamwamut Dkhar, 2nd u Rimingson Surong bad 3rd u Deiwanmi Surong. Ha ka Sub-Junior (Girls) haduh 14 snem la wan ba nyngkong 1st da ka Basalika Khyriem, 2nd ka Hunbait Khyriem bad 3rd ka Amadora Suting.
Ha ka Junior (Boys) 14-17 snem la wan ba nyngkong da u 1st da u Stefarwel Surong, 2nd u Readyson Sumer bad 3rd da u Gildfort Suting. Ha ka Junior (Girls) 14-17 snem la wan ba nyngkong 1st da ka Dawanbiangki Khyriem, 2nd ka Maialangi Langshiang bad 3rd ka Florence Nyalang.
Ha ka Senior (Male) 18 snem shaneng la wan ba nyngkong 1st da u Lamphrang Surong, 2nd Ferando Nongrum bad 3rd u Khanbit Langshiang. Ha ka Senior (Female) 18 snem shaneng la wan ba nyngkong 1st da ka Condeliza Dhar, 2nd da ka Basanti Rajput bad 3rd ka Lapynshai Dhar.
La sam ruh ïa ka khusnam Special Prize sha u khynnah uba rit tam ha ka jingïashim bynta kata u Kevinson Shylla uba don 6 snem ka rta.
Katba ki nongjop ha ka Painting Competition la wan ba nyngkong 1st da ka Emilisha Tariang, 2nd ka Eripun L. Syiemlieh bad 3rd da ka Jubanield L. Syiemlieh. Ha ka Essay Writing Competition la wan ba nyngkong 1st da u Xavi Azariel Khonglah, 2nd ka Seiniti Gympad bad 3rd da ka Condeliza Dhar.
La pynkut ïa ka prokram da ka jingkren ai khublei da u ma J. Tongper, uba la pynpaw ka jingkhublei kyrpang ïa ki bor pynïaid District, ka tnad pulit, ka tnad ka koit ka khiah, ïa ka Amlarem Sub-Division Sports Association, ki BLO, ki BLO Supervisor, ki Volunteer, ki samla pule bad ïa baroh ki nongtrei jong ka ophis SDO (Election).
