Mynsaw u RS ka Maikhuli ba pyni bor ki nong Assam ban pyrshah ïa ka jingthung post Electrict ka MeECL

Nongpoh, Kyllalyngkot 20 : U Rangbah Shnong ka shnong Maikhuli kaba don ha khappud ka Assam, u Nicholas Marak, ula mynsaw na ka jingshah thombor ha ki briew na Assam, kaba lam sha ka jingïa pyni bor kaba jur hapdeng ki nong Maikhuli bad ki nong Assam hynne ka janmiet sngi Ba-ar.
Kane ka jingkulmar kala mih na ka jingleit thung post electrict ka Meghalaya Energy Corporation Limited (MeECL) ha ka shnong Maikhuli ïa kaba la mih ban pyrshah jur da ki nong Assam, kiba kam trai ïa ka jaka.
Kat kum ka khubor, ki briew ka MeECL kila leit ban thung post electrict marjan ka pung dohkha ha Maikhuli, kaba don hapdeng ka jingïakam trai ïa u pud u sam hapdeng ka Maikhuli bad ka Assam. Lah ïathuh ba ki briew na ka Shnong Bakrapara, Assam kila wan ban pynibor bad da ka jingïamih sa ki briew na Maikhuli, kala lam sha ka jingïakulmarkaba jur.
La ïathuh ba ki Pulit ka Assam ruh kila ïadonlang ha kane ka por ba jia kane ka jingkulmar hynrei la kynnoh ba kila shu peit kai bad khlem leh eiei ban tem ïa kane ka jingïashoh ïadat.
Ki Pulit ka Meghalaya kiba dei na Pillangkata Police Outpost, mar ïa ïoh jingtip ïa kane ka jingjia, kila hiar wut wut sha katei ka jaka ban tem ïa u paidbah na baroh arliang.
Lah ban kdew ba dang shen, ka huri hura kala mih hapdeng ki nong Maikhuli bad Assam ha Maikhuli namar ka jingshah pyndam ki jingthoh jong ka skhim MGNREGA ha kawei ka jaka kaba don hajan ka pung ri dohkha jong ka Shnong.
Namar kane ka jingïakynduh, ki bor District kila thaw ïa ka Peace Committee kaba la rai ba baroh arliang mamla ki dei ban nym pynthut ïa ka jingwan ki kam pynroi ne ki jingtei hapoh ka thaiñ. Hynrei kine ki nong Assam ki dang kwah beit ban pyni bor haba ki briew ka Meghalaya ki leit tang ban thung ïa ki post electrict ruh.