Haduh 18 ngut ki nong Bangladeshi ïoh kem ki pulit ha ryngkat ki nongïarap na WJH

By Mawphor Editor On Jan 21, 2026

Jowai, K’Lyngkot 20: Ki pulit ka West Jaiñtia Hills District ha ryngkat u Waheh Shnong bad ki dkhot ka Village Defence Party (VDP) jong ka shnong Demthring, hynne ka step jong ka 20 tarik u Kyllalyngkot, 2026 ha ka por kumba 3 baje mynstep, kila ïoh kem nyngkong ïa saw ngut ki nong Bangladeshi ryngkat bad kawei ka kali kaba don ïa u registration number ML-04D 7339, kaba la ñiah da u Vishal Dkhar na Dawki.
Ïa kane ka kali la beh kthong naduh Lad Demthring bad la ïoh bat ïa ka hajan ka Sanmala Guest House, Amlarem.
Ki pulit ki la ïoh kem ruh arngut ki nong India u Meban Dkhar bad ka paralok jong u ka Melari Rasmut, ki la shah kem na Lad Demthring ryngkat bad ka kali jong ki, kaba don ïa u registration number ML-04D 4739.
Ha ka jingtohkit, u Meban Dkhar ula pynpaw ba dang don sa katto katne tylli ki kali kiba kit ïa ki nong Bangladeshi kiba dang wan na Jowai sha Dawki. Da ka jingtrei shitom ki pulit ki la pynlong ka jingkhynra kaba jur ha ki bynta jong ka Amlarem.
Katba ha ka por kumba 3:45 baje mynstep, ki pulit ki la kem sa lai tylli ki kali, kata ka ML-05AD 6424 kaba la ñiah da u Blessing Pamthied na ka shnong Jaraiñ, ka ML-04D 4993 kaba la ñiah da u Twel Rongngi na ka shnong Shkentalang bad ka ML-04E 0640 kaba la ñiah da ka Rimi Lyngdoh na ka shnong Shkentalang.
Na kitei ki kali la lap ba ki dang kit ïa 14 ngut ki nong Bangladeshi. Kumta, na kane ka jingkhynra la kem haduh 18 ngut ki nong Bangladeshi, 2 ngut ki nong India, 5 ngut ki nongñiah kali bad la bat syndon ïa kitei ki 5 tylli ki kali da ki pulit.
Ki pulit kiba register ïa ka mukotduma halor kane ka jingjia bad baroh ki briew kiba don bynta ha kane ka kam kila shah kem na ka bynta ka jingtohkit ba bniah katkum ki kyndon jong ka Immigration and Foreigners Act, 2025.
Halor kane ki pulit ka West Jaiñtia Hills ki dang pynlong shuh shuh ka pahara kaba jur ha ki shnong ki thaw bad khamtam ha ki thaiñ khappud. La kyrpad jur ïa baroh ki Waheh Shnong bad ki VDP ba kin wan shakhmat bad ban ïatreilang bad ka tnad pulit na ka bynta ka bha ka miat jong ka imlang sahlang.