Jowai, K’Lyngkot 20: Ka Khasi Jaiñtia Youth & Student Union (KJYSU), ha kane ka 19 tarik u Kyllalyngkot, 2026, ka la pan jingpynshai na ka Sorkar halor ka No Objection Certificate (NOC) kaba la pynmih da ka ophis jong ka Public Health Engineering (PHE) Electrical, Jowai Division, Jowai ha ka 27 tarik u Naiwieng, 2025 sha uwei u nongtrei Muster Roll uba la palat ka rta ha kane ka ophis (uba ym shym la kwah ban pynpaw kyrteng), ban aplai ïa ki kam ba la pynbna da kino kino ki seng, ka Sorkar ne ka Commission.
Katkum ka jingïathuh jong u President ka seng, u ma C. Phawa, ula ong ba hapoh kano ka aiñ ne ka kyndon ba kane ka ophis ka lah ban pynmih ïa kum kane ka NOC sha une u briew ban aplai ïa kum kine ki jingïakhun eksam.
U la bynrap ruh ba lada kane ka kyndon ka long kaba treikam sha kiwei pat ki Muster Roll ha jylla Meghalaya baroh kawei, lada ym dei kumta, balei ba kane ka ophis ka lah ban ai ïa kum kane ka NOC kyrpang tang sha une uwei u briew.
Ka seng ka la kyntu ïa ka Sorkar ban ai ka jingpynshai kaba shai hapoh shiphew sngi naduh ka tarik ba la pynmih ïa kane ka khubor, sha ki paidbah jong ka jylla Meghalaya baroh kawei, khnang ba baroh ki Muster Roll hapoh ka jylla kin ïoh jingtip shaphang kane ka kyndon.
