SHILLONG, Kyllalyngkot 20: U Snehal Dutta u la kamai marwei haduh 170 ron ban ïalam ïa ka Matrisangha sha ka jingjop kaba khraw da 189 ron ha ka jingïakhun pyrshah ïa ka Nongpdeng CC ha ka lympung Shillong Cricket League 2nd Division 2026 jong ka Shillong Cricket Association.
Hadien ba jop ïa ka jingkynting pisa (toss) ka Nongpdeng ka la aiti sha ka liang pyrshah ban tied nyngkong, ka rai kaba la kylla long ka jingbabe ïa ka kynhun, ha kaba ka Matrisangha ka la lah ban tied pyndep ïa ki 20 ober ban kamai 296 ron bad khyllem tang 2 wiket.
Kumba la kdew hakhmat, u Snehal u la lamkhmat ha ka tied da kaba kamai 170 ron tang naki 59 tylli ki bol, katba u Kaushik Bhowmik u la noh synñiang 78 ron naki 46 bol.
Nangta ki nongkawang bol jong ka Matrisangha ki la pyndep ïa la ka jong ka kamram, da kaba pynkhyllem noh baroh 10 wiket jong ka Nongpdeng tang na ka bynta 107 ron haki 17.3 ober, bad dei tang u Maitshaphrang Khongjee (31 ron naki 26 bol) bad u Raymond Thabah (18 ron naki 22 bol) kiba la kham seisoh ha ka tied.
U Kishor Bhowmik u la pynhap marwei haduh 5 wiket naki 4 ober bad ailad tang 18 ron, katba u Ravi Sunar u la weng 2 wiket naki 3.3 ober bad ailad tang 11 ron, kaba la pynthikna ïa ka Matrisangha ban jop suk da 189 ron. Ha kaba kut ïa ka nam Player of the Match la khur da u Snehal Dutta.
