Jam ka SSA Women’s League sha ka Semifinal; lashai yn ïaknieh rung final ki kynhun ba dang sah
Shillong, Kyllalyngkot 18: Ka Lumparing SC bad ka Pay For Right Football Academy ki la pynthikna kum ki ar tylli ki kynhun ba khatduh ban buh jaka ha ka Semi Final jong ka la lympung Women’s Football League 2026 ba la pynïaid da ka Shillong Sports Association da kaba jop ïa la ki jong ki jingïalehkai Quarter final ba la long ha ka sngi Saitjaiñ ha madan First Ground-SSA Stadium, Polo.
Na ka liang jong ka Lumparing ka la pynskhem ïa la ka jong ka jaka da kaba pynjemkhnap haduh 5-0 kol ïa ka Nongthymmai SC ha ka Quarter final ba nyngkong ha katei ka sngi, katba ka PFR FA ka la jop da tang kawei ka kol (1-0) pyrshah ïa ka New Challenger SC.
Ha ka jingïalehkai, ka Lumparing ka la pynthikna ïa ka jingkyrmen ban ïohrung naduh ka kylla step da kaba lamkhmat lypa haduh 4 kol kiba la thep da ka Savinity Jyndiang (12′), Barisha Wahlang (25′), Iaphisha Marbaniang (39′) bad ka Catherine Kharkongor (45’+4). Ka Catherine (54′) ka la pynkut ïa ka jingjop ba paka da kaba pynbud ïa ka kol kaba san ha ka kylla miet.
Nangta ka Quarter final kaba bud, tang shuwa ba ka jingïalehkai kan paw kumba kan jam sha ka penalty shootout ban rai ïa ka nongjop, ka Phibanda Mary Nongrum (90’+2) ka la ïoh ban pynkhih ïa ka namtam na ka bynta ka PFR kaba la pynmong ïa ka New Challenger.
Shuwa kane, ka Laitkor SC bad ka Rangdajied United FC kidei ki ar tylli kiwei pat ki kynhun kiba la rung semi final hadien ka jingjop ha ka sngi Thohdieng.
Hadien ba ladap lut baroh saw tylli ki jaka ka SSA kan pynlong ïa ka SemiFinal ha ka 20 tarik Kyllalyngkot (sngi Ba-ar). Ka semi final ba nyngkong kan long hapdeng ka Laitkor SC pyrshah ïa ka Pay For Right Football Academy ha ka por 11 baje mynstep, nangta ka Rangdajied United FC kan aireng pyrshah ïa ka Lumparing SC ha ka por 2 baje noh phaisngi.
Kumba long ha ka QuarterFinal, ka por ba la mang na ka bynta ka semifinal ka long 90 minit. Hynrei mynta, lada jia ba ïakhaid ha kaba kut jong ka 90 minit, kan don ka por pynjlan lane ka extra time kaba 15 minit, lada dang ïakhaid ha kaba kut jong kane ka por pynjlan, yn pyndonkam ïa ka penalty shootout ban rai ïa ka nongjop.