Shillong, Naitung 09: Hadien ba ki nongñiah trok kit maw ban leit pynhap sha Bangladesh lyngba ka kad khaïi kaba don ha Tamabil Dawki kiba don hapoh ka shatri jong ka Bri Hynñiewtrep Exporters and Importers Association ki la shah shoh bad shah khang ha ka 3 tarik Naitung ha jaka pynïeng ïa kine ki trok Madanlyntad ban leit pynhap ïa u maw jong ki ha ki briew kiba ki suba ki dei kiba don hapoh ka Riwar Mihngi Exportes and Importers Association namar ba ki dei ki nongwei kiba ym shem dei satia na kane ka thaiñ Pynursla.
Na ka liang ki saw tylli ki seng bhalang jong kane ka thaiñ kiba kynthup ïa ka FKJGP Riwar Mihngi Circle, KSU South Central East, HYC bad HNYF Riwar Mihngi Circle ki pynrem jur ïa ka jingjia kaba la jia ha ka 3 tarik u Naitung 2022 ha Parking lot jong ki trok ha Madanlyngtad harum Pynursla ha ka por miet ha kaba ka la don ka jingshah ktah kti jong ki nongñiah trok ha ki briew bym ithuh dur khmat.
Ha ka kyrwoh kine ki saw seng ki ong ba “kine ki riew shim kabu bad pynmih ruh ïa ki kyntien ba khlem akor kumba ngi la iohi lyngba ki lad pathai khubor kaba la ktah shisha ïa ka shongsuk shongsain khamtam ïa ki nongñiah kali trok kiba ju leit pynhap maw sha Bangladesh ka long kaei kaei kaba ym lah ban pdiang”
Na ka liang ki Saw Seng ka kyntu ruh ba kam ju don ka jingïapher jaidbynriew ne sngew nongwei katba ngi dang dei ki para Khasi kiba ïa treikam hapoh ka Bri u Hynñiewtrep. Na ka liang ki saw seng ki maham jur ruh ïa ki riew shim kabu bad ki riew shimet ne ki kynhun kiba donkti ba lada jia biang kum kane ka jingjia nangne shakhmat na ka liang ki saw seng kin thwet bad ban phah pynshitom katkum ka aiñ.
Shuh shuh naka liang ki saw seng ki pynrem jur ruh ïa ki bor jong ka aiñ, ki pulit kiba don lang ha katei ka sngi ha ka juh ka jaka namar kim shym la leh eiei wat la katei ka jingjia ka jia ha ka por ba ma ki ruh ki don lang ha katei ka jaka.
Ki Saw Seng ki la pynpaw ïa ka jingpynrem jur namar katkum na ki lad pathai khubor la shem ruh ba ki briew jong ka Association Riwar ki don lang ha katei ka jaka ba jia ka jingshah shoh ki nongniah trok.
“Kyntang ïawai ki saw seng ki pynrem jur ruh ïa ka Parking Lot kiba pyntreikam ïa ka Special Quota bad ka jinglong shilliang khmat ha ka rukom pynïaid bad lada long kumne dang lah ka bym don ka parking jong ki trok ba ban pyntreikam noh kat uba ioh leit nyngkong u ioh rung nyngkong” pynkut ka kyrwoh ki saw seng.
