Shillong, Naitung 09: Ka jingsdang ïa ka jingrah pateng ïa ka sharak Chess Olympiad Torch Relay ka la long na ka I.G. Stadium, New Delhi ha ka 19 tarik u Jylliew 2022 ba la plie da u Myntri Rangbah Duh ka ri, u Narendra Modi bad kane ka sharak ka la poi bad sangeh shipor ha Shillong ha ka 9 tarik u Naitung, 2022.
Ka jingai pateng ïa ka sharak da u Mitrba Guha, Grand Master sha u kongsan kan long ha Indoor Stadium SAI, STC, NEHU Campus, Mawkynroh, Shillong ha ka 10 tarik u Naitung ha ka por 8 baje mynstep.
Lah ban shu kdew hangne ba ïa ka bynta kaba 44 jong ka Chess Olympiad la ai da ka World Chess Federation (FIDE) sha ka All India Chess Federation bad kane kan long ha Mahabalipuram, Tamil Nadu naduh ka 28 tarik u Naitung haduh ka 9 tarik u Nailar, 2022. Ha kane ka bynta, ka FIDE ka la pynlong ïa ka Chess Olympiad Torch Relay kaba nyngkong kum ka dak jong kane ka jingïalehkai ban long ha India, ka ri kaba la kha ïa ka jingïalehkai chess. Yn rah ïa kane ka sharak sha baroh ki bynta jong ka ri bad khamtam sha ki 75 tylli ki jaka ba kongsan jong ka ri kum shi bynta ka jingrakhe ïa ka “Azadi Ka Amrit Mahotsav”.
U president ka FIDE, Arkady Dvorkovich u la ai ka kane ka sharak sha u Myntri Rangbah Duh, uba la ai pateng pat ïa kane sha u nonglehkai chess uba la pawnam bha, u Viswanathan Anand. Hadien kane, ka sharak ka la poi sha ki jaka bapher bapher jong ka ri kum ka Red Fort ha ka nongbah jong ka ri, ka Attari Border ha Amritsar, ka Taj Mahal ha Agra bad ka Vidhan Sabha ha Lucknow ryngkat kiwei kiwei ki jaka.
Kane ka dei ka sien kaba nyngkong ha kane ka jingïalehkai ba yn pynlong ïa ka bynta kaba 44 jong ka FIDE Chess Olympiad ha India kaba long ruh ka ri kaba nyngkong ban sdang ïa kane ka jingrah pateng ïa ka sharak ïa kaba la sdang da ka FIDE ha kane ka sien kaba nyngkong naduh ba la sdang pynlong ïa kane ka jingïalehkai ha u snem 1927. Namar ka jingïalehkai kan long ha India, ka ri kan phah 20 ngut ki nongïalehkai kaba long ka kynhun nongïalehkai kaba heh tam ban ïashim bynta ha kane ka lympung ïalehkai.
Ka India ka don hok ba phah mar ar kynhun na ka bynta ka thup Open bad ka thup jong ki nongïalehkai kynthei. Yn wan ïashim bynta kumba 2000 ngut ki nongïalehkai na 188 tylli ki ri, kaba long kaba bun tam ha ka histori jong ka Chess Olympiad. Ka bynta kaba 44 jong ka FIDE Chess Olympiad kan long ha Chennai naduh ka 28 tarik u Naitung haduh ka 10 tarik u Nailar, 2022.
