Sha ka 18 bad 19 la pynkynriah ïa ka lehñiam Sohjer ka Raid Marwet, wer u syiem ïa ki khun ki hajar ka Raid

Nongpoh, K’Lyngkot 16: Naki daw bym lah kiar namar ki jingjia ba sngewsih hapoh ka Raid u Syiem ka Raid Marwet u la pynbna paidbah bala hap ban pynkynriah noh ïaka lehñiam Sohjer naka 17 sha ka 18 bad 19 tarik mynta u bnai.
Naka liang u Syiem ka Raid Marwet u Paiem Ken Syiem u la pan mab naki khun ki hajar halor kane ka jingpynkynriah ïaka tarik nala 17 tarik kaba la mang, namar mynta u snem kim lah ban pynlong ha katei ka tarik naki daw bym lah kiar namar ki don ki jingjia ba sngewsih hapoh ka Raid bad naka liang u Syiem u la wer ïaki paidbah bad ki khun ki hajar ka Raid Marwet ba kin wan ban sakhi ha kane ka sngi ban iohi ïaka jingriewspah ka kolshor tynrai bad ka riti dustur bala buh naduh u mynbarim.
Kum ban shu pynpaw ba katei ka jinglehñiam Shad Sohjer ka long ban ainguh aidem ïa u Blei Nongbuh nongthaw ba un theh ki jingkyrkhu baroh shisnem hadien ba ki khun ki hajar kila dep ban kheit ïa u soh nyngkong jong ka jingtrei shitom.