Shillong, K’ Lyngkot 15: Kum shi bynta ban khang lad ïa ka jingwan rung kyrthlep ki mynder sha ka jylla Meghalaya, ka Hynñiewtrep Youths’ Development Council (HYDC) kala dawa na ka sorkar ba dei ban pyntrei kam noh mardor ïa ka Eastern Bengal Frontier Regulation 1873.
Haba ïa kren bad ki lad pathai khubor u President ka HYDC u Bah Wyriwan Sohtun u la ong ba ka jingkren ba dang shen jong u symbud myntri rangbah ka jylla u Bah Prestone Tynsong uba la ong ba un pynrung ïa ki kyndon ba ïasyriem kum ka ILP ha ka Immigration and Foreigners Act, 2025 dei ban pyntrei kam ha baroh kawei ka ri India, hynrei hapoh ka jylla Meghalayangi donkam ïa ka ILP.
“Ka sorkar kadei ban sngap ïa ka jingangnud bad ka jingkwah jong ki paidbah kaba la slem bha kata ban pynioh noh ïa ka ILP namar ba kane ka Immigration and Foreigners Act, 2025 ka long kum ka jingong ka wine kaba rim hynrei la shu buh ha u bilor ba thymmai namar ba kane kadei ka ain kaba la rim” ong u Bah Sohtung.
U Bah Sohtun u la pynpaw ba ïa ka ILP hapoh ka jylla Meghalaya la dep ban pass da ka resolution hapoh ka ïing dorbar thaw ain ka jylla bad na ka liang u Union Home Minister u Amit Shah u la dep kren ïa kine ki kyntien kiba ong “khie leit ban leh kmen Christmas ngin sa peit ïa ka ILP”, hynrei haduh mynta ngim pat ïoh ïa ka ILP.
“Ko sorkar India nai kren kyllain namar ba ngi lah ngiah ngi lah kdang shu kren beit da kaba shai ai ne em ïa ka ILP, khnang ba ki paidbah nong shong shnong kin shim noh da kawei ka sienjam” ong u Bah Sohtun.
Lada don kine ki ain kiba la kren u Bah Prestone kin ym pat lah ban khanglad ïa ka influx hapoh ka jylla Meghalaya namar ba kane ka Immigration and Foreigners Act, 2025 ka shu peit tang ïa kiba nabar ri, ong u Bah Sohtun.
“Ngi dawa ban pyntrei kam noh mardor ïa ka Eastern Bengal Frontier Regulation 1873 bad ïa ka Immigration and Foreigners Act, 2025 to pyntrei kam noh ha baroh kawei ka ri India” ong u Bah Sohtun.
Shuh shuh u Bah Sohtun u la buh ka jingkylli kaei ka jingeh ban ai noh ïa ka ILP ha Meghalaya, katba ïa ka jylla Manipur tang shapoh shi kynta la ïoh bad kumjuh ruh ha jylla Mizoram.
“Ka sorkar India ka niew bein ïa ki paidbah nong shong shnong ka jylla Meghalaya namar ka jingbym pyntrei kam ïa ka ILP wat hadien ba la dep ban pass da ka resolution da ki 60 ngut ki MLA ha ïing dorbar thaw ain ha u snem 2019” u la ong.
