Ryngkat 26 ngut ki nongïalehkai mih ka kynhun phutbol ki kynthei ka India ban leit sha Türkey

Gurugram, Kyllalyngkot 15: Ka kynhun phutbol ba la rangbah jong ki kynthei jong ka ri India, kaba don 26 ngut ki nongïalehkai, ka la mih noh na ka prokram kilanmet ban leit sha Türkey ha ka sngi Palei, 15 tarik u Kyllalyngkot, 2026, ha kaba ka kynhun kan ïakhun ïa lai tylli ki jingïalehkai paralok.
Ka India kaba dang pynkhreh ïa ka AFC Women’s Asian Cup Australia 2026, ka la pynlong ïa ka jingkilanmet kaba lyngkot kaba lai sngi ha Gurugram naduh ka 12 tarik haduh ka 14 tarik u Kyllalyngkot.
Ka India ka la shah pynngat lang ha kajuh ka Group bad ka Vietnam, ka Chinese Taipei bad ka Japan ha ka Asian Cup – ka lympung ïalehkai ba ka la ïoh rung ha ka sien kaba nyngkong eh da ka jinglah jong ka.
Ka kynhun ka la wanpoi ha Antalya, Turkiye, ha ka janmiet jong ka sngi Palei, bad kan ïalehkai ïa ki jingïalehkai paralok pyrshah ïa ki lai tylli ki klob Europe — ka FC Metalist 1925 Kharkiv (Ukraine), ka FC Zürich Frauen (Switzerland), bad ka FC Schlieren (Switzerland) ha ka nongbah Manavgat, kaba jngai kumba 75 kilomitar na Antalya.
Ka Sanfida Nongrum, ka thei ïalehkai jong ka jylla Meghalaya, kaba la shah jied ha ka kynhun kaba kilanmet ha Gurugram, ka la shah kynthup napdeng ki hynriew ngut ki nongïalehkai pdeng lane ki midfielder, kiba paw kyrteng ha ka thup ban leit sha Turkey.
Ka Soumya Guguloth kaba ïalehkai kum ka Winger bad ka thei-ïalehkai pdeng ka Karthika Angamuthu kim shym la shah kynthup ha ka kynhun kaba leit sha Türkey namar ka jingmynsaw.
Ka thup kyrteng jong ka kynhun India kaba leit sha Turkey ki long:
Goalkeeper: Elangbam Panthoi Chanu, Sowmiya Narayanasamy, Shreya Hooda, Adrija Sarkhel.
Defender: Sweety Devi Ngangbam, Shilky Devi Hemam, Juli Kishan, Nirmala Devi Phanjoubam, Sanju, Astam Oraon, Sarita Yumnam, Sushmita Lepcha, Martina Thokchom.
Midfielder: Sangita Basfore, Babina Devi Lisham, Priyadharshini Selladurai, Anju Tamang, Jasoda Munda, Sanfida Nongrum.
Forward: Grace Dangmei, Karishma Shirvoikar, Rimpa Haldar, Malavika P, Pyari Xaxa, Lynda Kom Serto, Kaviya Pakkirisamy.
Ka prokram jong ki jingïalehkai paralok ki long:
18 tarik K’lyngkot: India vs FC Metalist 1925 Kharkiv, Emirhan Sport Centre, por 5:30 baje janmiet
21 tarik K’lyngkot: India vs FC Zürich Frauen, Emirhan Sport Centre, por 5:30 baje janmiet
24 tarik K’lyngkot: India vs FC Schlieren, Evrenseki/Ilica Stadium, por 5:30 baje janmiet