Shim bynta u Bah Liander Nongshli ha ka jingpynisap ki khun samla ha ka Youth Convention ha Umkadhor

Nongpoh, K’lyngkot 11: Kum u wei na u samla rangbah ka dong Ri Bhoi bad uba dei ruh u Working President ka Ri Bhoi Youth Federation (RBYF), u Bah Liander Nongshli ha ka janmiet jong ka sngi Saitjaiñ u la leit ban ai mynsiem ïa ki khun samla ka balang Katholik jong ka Zone-VI kiba la pynlong ïa ka 6th Youth Convention kaba la sdang naduh ka 9 tarik u Kyllalyngkot bad pynkut haduh ka 11 tarik u Kyllalyngkot kaba dei mynta sngi u Blei ba la pynlong ha Umkadhor Parish ha Ri Bhoi District.
Kane ka dei ka youth Convention lane ka jingïakynduhlang jong ki khun samla man la u snem ba hap ha ka Zone-VI bad ki don haduh 6 tylli ki parish ba kynthup ïa ka parish Umsiang, Umden, Nongpoh, Byrnihat, Umgtyrnga bad Umkadhor Parishm, ba ki khun samla ka Balang Katholik kynthei bad shynrang na kitei ki parish ki la wan ban shim bynta shitrhem ha kane ka Youth Convention.
U Bah Liander Nongshli kum u nongïalam ka RBYF bad u samla ka them Ri Bhoi u la shah kot sngewbha kum u kongsan ha ka prokram ka jingïapynisap ki khun samla (Talent Show) ba la pynlong ha janmiet jong ka sngi Saitjain bad ki samla na kitei ki 6 tylli ki Parish ki la shim bynta ban ïa knieh ïa ka nam jop bad ruh ba la sam da ki khusnam sha kito ki nongjop.
Ha kane ka rynsan ka jingïapynisap ki khun samla, nalor u Bah Liander Nongshli kum u kongsan la sakhi lang ruh da ka jingdon lang u Fr. Kynsai Kurbah, Assistant Parish Priest ka Umkadhor, u Emelius Maioing, President ka Zone-VI, u Iolines Syiem General Secretary bad la wan ban pynshongshit ruh da u Bah Anthony Jana lyngba ki sap rwai jong u sha ki hajar ngut ki khun samla ha kane ka Convention.
Ha kane ka Youth Convention la ai ruh ïa ka phang pdeng: “U Krist ka jingkyrmen jongngi” ba la sot na ka shithi u Paul sha u Timothy na ka lynnong kaba 1:1 bad lyngba kane ka phang pdeng ka jingthmu ka long ban ai mynsiem bad ban pynshlur ïa ki khun samla ba kin phai sha u Jisu uba long ka jingkyrmen ïa baroh.
Haba kren ruh ha kane ka sngi kum u kongsan, u Bah Liander Nongshli u la ai mynsiem ïa ki khun samla kynthei bad shynrang ba ki dei ban long kita ki samla kiba don ka jingkitkhlieh ïa ka kam ka jong u Blei bad kumjuh ruh na ka bynta ka bha ka miat jong ka ïing ka sem bad ka imlang ka sahlang.
U la ong ruh kum ki samla kim dei ban buhrieh ïa ki sap ki phong ne ka jingstad kaba ki don kumba la ai kyrpang da u Blei bad ki dei ban sam lem sha kiwei ki khun samla, namar ka kamram jong ki samla kiba don ka jingkitkhlieh ïa ka Balang, ka ïing ka sem bad ka imlang ka sahlang ki dei ban long kita ki nongtei bad ym ki nongpynjot pynpra.
Shuh shuh, u la kyntu ruh ïa ki khun samla ba ki dei ban phai sha u Blei namar ha ka jingim samla ki ïa kynduh shibun ki jingeh bad ki jingtynjuh, hynrei lada kita ki samla kiba phai sha u Blei kin ioh ïa ka jingstad bad ka jingshemphang ban ïa khun ïa kita ki jingeh ba ki ïa kynduh ha ka jingïaid lynti kum kita ki khun samla ha kane ka pyrthei, u la bynrap.