NEWDELHI, Kyllalyngkot 07: Ka samoi ïalehkai 2025-26 jong ka Indian Super League (ISL) kan sdang ha ka 14 tarik Rymphang, kumba la rai ha ka jingïalang ba kyrkieh jong ka All India Football Federation (AIFF) ha ka sngi Ba-ar.
Kane ka lympung kan don 91 tylli ki jingïalehkai ban pynïakhun ha ka rukom ïalehkai kaba tang shi sien (single leg) ha ïing bad shabar, ha kaba shiteng na ki jingïalehkai kin long hala ïing bad kiwei pat shabar.
ïa ki prokram ïalehkai ban ïakhun ha la iing bad shabar yn sa ïakren bad pynbeit hapdeng ka synjuk bad ki klob ISL bapher bapher.
“Ka dei ka sngi kaba kmen ïa ka phutbol India. Ka East Bengal ka la ong naduh ka sngi ba nyngkong ba kane ka league kan urlong. Kane ka ri ka don shibun ki nongkyrshan kiba ieit ïa ka phutbol, ka sorkar kaba kyrshan ïa ka kam ïalehkai bad ka synjuk. Ha kum kane ka khep, ka jingbym lah ban pynurlong ïa kane ka league ka dei kaei kaei kaba ngim lah ban pdiang satia,” la ong u Debarata Sarkar, u official ba rangbah jong ka klob East Bengal.
Haduh mynta ki la don shiphew tylli ki kynhun, kynthup ïa ka East Bengal bad ka Mohun Bagan Super Giant, kiba la pynthikna ïa ka jingïashim bynta ha kane ka lympung lyngba ka mail, hynrei ka tnad Sports bad ka synjuk ki don ka jingkyrmen ba baroh 14 tylli ki klob kin ïakhun ha kane ka league.
“Ngi kwah ba ka phutbol kan sdang, bad kum ka klob, ngi kwah ban pynthikna biang ba ngin sa ïalehkai ha ka league,” la pynpaw u Mandar Tamhane, u CEO jong ka NorthEast United.
“Ngi ai khublei ïa ka sorkar, ka synjuk bad kumjuh ruh ïa ki klob kiba la peit ïa ka dur kaba kham heh, da kaba buh ha ka jingmut ïa ka phutbol India, bad pynlong ïa kane ka kam (ka ISL) kaba khatduh eh ban jia.”
“Ka la don ka jingbym thikna ïa ka ISL ha kine ki khyndiat bnai ba la dep, bad don ki mat kiba hap ban buh ha ka jingmut, kum ka jingbthah na ka ïingbishar ba ha khlieh duh halor ka riti synshar jong ka AIFF bad hadien kata ka jingpynkhreh ïa ka RFQ katkum kajuh,” la ong u President ka AIFF u Kalyan Chaubey.
“Ka jingïateh kular jong ka hok longtrai lane ka Master Rights Agreement (MRA) ruh ka la paw ba kan kut noh ha kajuh ka por. Ha kum kane ka khep, baroh ki la jia ha ka shiteng samoi, kumta ban sdang ïa ka league khlem ka kompeni kaba wan shakhmat ban shim ïa ka jingkitkhlieh ka long kaba eh, watla uwei pa uwei u nongshim bynta, kynthup ïa ki nongkyrshan, ki nongïalehkai bad ngi baroh, ngi kwah ba ka league kan jia.
“Hynrei nga sngewkmen ba ngi lah ban pynthikna lang ïa ki tarik na ka bynta ka league, bad nga kwah ban ai khublei ïa baroh ki nongshim bynta kiba la poi sha ka jingïasngewthuh jingmut,” u la bynrap.
