Nongpoh, K’Lyngkot 07: Ka jingrben jong ki phngit pum pum ba ïong ngaiñ kiba her sha ki shnong ki thaw bad sop ïa ki jingthung jingtep ha ka thaiñ Byrnihat na ki karkhana ka la pynlong ïa ki nongrep ban ïam kthang bad sohsat namar ka jingduhnong bad tang ban sait ïa ki jhur bad u tympew ruh la jynjar.
Katto katne ki nongrep tympew kila ong ba wat ban sait ïa u tympew ruh la shem jingeh namar ka jingjaboh bad ka jingrben jong ki pum pum kiba sop ha ki sla bad kiba bit pnek pnek.
Bun naki nongrep ha katei ka thaiñ kila pynpaw ka jingeh ba ki ïakynduh man ka sngi ha ka jingim jong ki kaba long shisha ka jingma ïa ka koit ka khiah jong ki paidbah kiba shong ba sah bad im man ka sngi hajan kitei ki karkhana.
Ki nongrep kwai, nongrep jhur, tympew mynta ki don hapdeng ka sohsat bad ka jingïam kthang kaba khraw namar ki jhur ki jhep bad u kwai u tympew kim don dor shuh ha ïew ha hat namar tang ban sait ruh lah jynjar, ba wat ki nongtrei ruh kila kyntait ban kheit bad sait ïa ki kwai ki tympew ba thmu ban die sha ïew kumba la sakhi ruh ba ki nongrep kim banse ban hap pdeng um ban sait katba lah ban pynkhuid ïa u sla tympew.
Kumba ki paidbah naduh ki nongrep ki ju ud halor ka jingjaboh kaba shyrkhei kaba her ha ki karkhana ki bym kheiñ snep ïa ka ud ka nam jong ki, ki la kyrpad sha ka sorkar ba kan leh eiei ban pynduna katba lah ïa kitei ki tdem jaboh kiba hap kum ka ïor ba ïong sha ki shnong ki thaw ki paidbah haduh ba kim nud shuh ban bam ïa ki jhur ki jhep ba ki thung.
