Palat 40 snem ym pat don ka jingmaramot ïa ki post bording, sngewkhia ka SRSSMA

Mawkyrwat, K’lyngkot 07: Ka Synjuk ki Rangbah San Shnong Manad Area (SRSSMA) ki la pynpaw ïa ka jingsngewkhia kaba jur halor ka jingbym shimkhia bad leh bym suid ñiew jong ka tnat ba dei peit ïa ka bor ne ka MeECL hapoh ka Mawkyrwat Division ban maramot ne pynbha ïa ki post bording kiba la sator bad sarang bad ym tang kata, kiba pynsyier bad buh jingma ruh wat ïa ka ïaid ka ïeng ki paidbah khamtam ha ka aïom slap ha kaba bun na ki longïing ki hap ban leit sah sha ki ïing ki para marjan namar ka jingtieng ïa ki sainar kiba kem ding ha ka por ba jur ka lyer.
Katkum ka khubor ba la phah da u Bah Lyngdoh uba dei u Myntri Shnong Manad bad kumjuh ruh na u bah Redy Shylla uba bat kum u President jong ka Synjuk ki Rangbah San Shnong Manad Area (SRSSMA) ki la ong ba ka jingwan buh ïa ki post bording mynta ka la jan dap 40 snem ha kine ka thaiñ San Shnong Manad Area hynrei sngewsih pat ba haduh mynta ym pat shym la don kata ka jingwan pynbha ne jingmaramot ïa kine ki post bording kiba la tor.
Namarkata, kum ka Synjuk lyngba kane ka kyrwoh khubor ka dawa ïa ka tnat bording ba kan sngap bad shimkhia lem ïa kine ki jingeh jong ki thaiñ Nongkyndong ym ban shu peit ne ïohi bad ïoh sngew na ka jingïathuh khana nangne nangtai hynrei dei ban wan peit bad wan maramot noh kloi ïa ki post bording kiba la sarang bad ban pynkynriah noh ïa ki post kiba don marjan bad ki ïing briew namar ka buh jingma bad jingsyier ïa ki paidbah nongshong shnong.
Ym tang kata, ka Synjuk ka dawa ruh ki nongpeit ne ki line-man kiba dei peit ha kitei ki thaiñ jong ka San Shnong Manad Area ba ki dei ban don ha kine ki shnong ym ban sah ha kiwei ki jaka kiba jngai na kane ka thaiñ namar lada don jingjia eiei kaba kyrkieh khamtam eh ha ka por lyiur ba kan nym buh jingeh ïa ki paidbah.