Naduh ka Khristmas haduh ka jingrakhe snem thymmai wanphai ka suk ka saiñ ha Langpih

Nongstoiñ, K’lyngkot 06 : Ka shnong Langpih kawei na ki shnong khappud kaba la shong khleh jaitbynriew kata ki Khasi kiba dei ki trai muluk naduh hyndai, ki Garo bad ki Nepali.
Ha ki snem ba mynshuwa ki ju mih ki kynrum kynram bad ki huri hura ba bun jait hynrei ha kine ki lai snem tam ka shong suk shong saiñ ka la wan phai biang. Ha kine ki khyndiat sngi ba la dep u Bah Hesding Sangleiñ Secretary jong ka shnong Langpih haba ïakren bad u nongthohkhubor u la ong ba ha ki snem ba mynshuwa ha ki sngi shuwa ban poi ka Khristmas bad Snem Thymmai ki ju mih ki jingïakajia namar ka jingwan dih kyiad pathar jong ki briew na kiwei pat ki shnong bad ki don ruh wat ki trai shnong kiba ïadih ïa bam lang bad haba ki la shoh khawiang bunsien ki ju kop bad kren klumar kumta ka mih ki jingïabun nia kaba pynpoi haduh u pud jong ka jingïahuri hura ruh.
U bah Sangleiñ u la ong ruh ba ha une u snem 2025 ba dang shu dep ka Dorbar Shnong Langpih da kawei ka jingmut ka la ïakut ba mar shu mih u bnai Nohprah ki riew rangbah na man la kawei pa kawei ka thliew ïing ki dei ban ïengtylli bad peitngor bha ba kam dei ban don kano kano ka huri hura lane ka jingïadih kyiad pathar khamtam eh ha ka taïew Khristmas bad ka taïew shuwa ban pdiang ïa u snem thymmai bad ka Dorbar Shnong ka la pynbna ïar ha ka thaiñ baroh kawei ba lada lap ba ki don ki briew kiba ïaleh pyrshah ka dorbar shnong kan ym map hynrei kan pynshitom da kaba tyngeh ryngkat ka kuna kaba heh bha bad kin aiti ruh ha ki bor ka aiñ ba kin leh ïa kaba don kam.
U bah Sangleiñ u la ong ruh ba naduh ba ka dorbar shnong ka la pynbna ïa katei ka jingmana ka suk ka saiñka la wan phai biang bad naduh ka taïew shuwa ka Khristmas haduh ka miet 31 tarik ym don shuh kiba hylla bad kiba ïadih ïabam pathar kumba long ha ki snem ba mynshuwa.
U la ong ruh ba wat ha ka 1 tarik kata naduh ka por mynsngi ba ka dorbar shnong ka pynlong ïa ka jingkhawai snem thymmai ïa baroh ki khun shnong khun thaw haduh ka por mynmiet haba pynlong ïa ka jingïalehkai tamasa da ki jait jingïalehkai drama ba bun jait ym shym la don kino kino ki briew kiba nud ban pynthut ïa ki paidbah kiba wan peit kai ha ka tamasa.
Nalor kata u la ong ba nangne sha khmat ka dorbar shnong ka la ïakut ba kan dang ïai bteng ban pynneh ïa ka shong suk shnongsaiñ bad kan ym ailad ïa kino kino ki briew kiba dei napoh shnong, ne na ki shnong ba marjan bad ïa ki nongwei ruh kumjuh ba kin wan ha shnong Langpih da kaba thmu ban wan ïadih ïabam ne ban pynshit ïa ki nongshong shnong ba kin leh kino kino ki kam kiba long pyrshah ïa ka imlang sahlang bad ka shong suk shong saiñ.
Ha kajuh ka por u la ong ba na ka liang ka dorbar shnong ka don ruh ka jingïatreilang kaba jan bha bad ki pulit kiba don ha Langpih Border Out Post bad haba don kino kino ki jingjia ki rangbah shnong bad ki pulit ki ju ïa don ryngkat khnang ban lait na kino kino ki kynrum kynram.