Ka sorkar ka dei ban bishar bniah ïa ka kaiphod Reservation Policy shwa ban pynbna paidbah : Pala

Shillong, K’lyngkot 6 : U President ka Congress u Ma Vincent H Pala ha ka sngi Nyngkong, ula kyntu ba ka sorkar ka dei leh phikir bha halor ka kaiphod ka Expert Committee halor ka Meghalaya Reservation Policy, haba maham ba ka Sorkar ka dei ban bud ïa ki lynti kiba dei ban leh hashuwa ban pynbna paidbah ïa kino kino ki jingai jingmut.
“Nga tharai ba hadien ba ka Exepert Committee kala aiti ïa ka kaiphod halor ka State Reservation Policy, ka Sorkar ka hap ban ïasyllok bad hadien kane kan sa wanrah hapoh ka ïing Dorbar. Kam lah ban shu pynlong paidbah kumto” ong u Ma Pala.
Ula batai ïa ki rukom leh haba ïadei bad kum kine ki kaiphod bad ong “Ka ju dei ka rukom ba haba phi thung ïa ka Commission, ngam tip kaba kumno kata ka rukom treikam ki leh hangne hynrei lada dei ha ka Sorkar Pdeng, nyngkong kin hap ban ïakren hapoh ka Sorkar, kino ki jingai jingmut ba ka pdiang bad kano kaba kyntait bad hadien kin sa ïatai hapoh ka ïing Dorbar Thaw Aiñ bad dei hadien kane ba kila lah ban pynbna paidbah ïa ka”.
U Ma Pala ula pynpaw ïa ka jingkyllaiñ bha kane ka kam, haba pynpaw ba ka kaiphod ka don haduh 4000-5000 sla bad ka lah ban don shibun ki jingktah.
“Kan shim por ïa ka Sorkar ban bishar bniah ïa ka kaiphod ba 4000-5000 sla. Kam dei ka kam kaba suk. Naba kane ka dei ka kam kaba kyllaiñ bha bad kaba lah ban pynmih ïa kino kino ki jingjia kumba jia ha Manipur, Jammu & Kashmir, Bangladesh. Ha Bangladesh, ka daw hi ka dei ka Reservation. Kumta, ka Sorkar ka dei ban bishar bha bad rai la kan pdiang ne kyntait” ula pynpaw.
Ula bynrap ba ka jingïakren ha ka Sorkar kan donkam ban hap long phikir bha shuwa ban shim rai khnang ban kiar ïa kino kino ki jingjia ki bym itynnad. “Nga tharai, ka Sorkar kan shimpor namar kane ka kam ka long kaba kyllaiñ bad kaei kaei ka lah ban jia ha kano kano ka por”.
Ha ka 19 tarik Nohprah 2025, u Myntri Rangbah ka Jylla Conrad K Sangma ula kular ba ïa ka kaiphod jong ka Expert Committee on the State Reservation Policy, kaba khia haduh 200 kilo bad ba don haduh 4000-5000 sla, yn sa pynlait paidbah shen.
Ha kajuh ka por, ka Sorkar kala bthah ïa u Chief Secretary bad kiwei ki heh Ophisar ka Jylla ba kin bishar bniah ïa man ki kyntien bad man ki sla jong ka kaiphod ka Expert Committee bad ban aiti ïa ka kaiphod sha ka Sorkar.