Mawkyrwat, Kyllalyngkot 06: Ka kynhun ïalehkai jong ka ophis MeECL ka la long ka lahduh ha ka lympung kaba dei jong ka Inter Office Football Tournament (IOFT)katba ka Jakrem Sports Club pat ka la rah ïa ka nam lahduh ha ka Women League Football Tournament (WLFT) kaba la pynïaid da ka Mawkyrwat District Sports Association (MDSA) ha madan Artificial Turf, Nonglang, South West Khasi Hills District.
Haba phai ha ka jingïalehkai phainal kaba dei jong ka Inter Office, ka jinglehkai ka la long hapdeng ka ophis SP-A pyrshah ïa ka ophis MeECL ha kaba ka MeECL ka la lah ban pynliem da 1 – 0 kol ïa ka ophis SP-A ha kaba ïa ka kol la thep da u Bikrom Lyngkhoi ha ka jingïalehkai jong ka kyllastep ha ka minit kaba 20.
Haba phai pat ha ka jinglehkai phainal jong ka Women League pat, ka Mawten Sports Club ka la shah pynliem noh ha ka Jakrem Sports Club da 2 – 0 kol ba la thep da ka Barisha Wahlang ha ka minit kaba 17 jong ka kyllastep bad kawei pat ka la thep ha ka kyllamiet ha ka minit kaba 67.
Haba kaba kut jong ka jingïalehkai, la ïoh ban sam ïa ki khusnam sha baroh ki kynhun kiba la poi sha ka jingjop bad kumjuh ruh ki khusnam kyrpang kata ïa u bah Moonstar Khar Turnia kum u ‘rangïalehkai ba la heh ka rta na ka Civil Hospital Mawkyrwat, ka khusnam nongthep bun kol ha ka Inter Office ka leit sha u bah Arrowstar Wanniang na ka Office SP-A uba ïoh ban thep haduh 7 kol ha baroh kawei ka lympung. Nangta, ïa ka nam ‘rangïalehkai ba tbit la ïoh da u Bikrom lyngkhoi bad nongapkol ba tbit ka leit sha u Krasman Myrthong kiba dei jong ka jong ka MeECL Office.
Ïa ka khusnm ha ka Women League pat, ïa ka nam nongthep bun kol la ïoh da ka Juviality Lyngdoh jong ka Mawten Sports Club kaba la ïoh ban thep haduh 12 tylli ki kol, ïa ka nam ‘thei ïalehkai ba tbit la ïoh da ka Barisha Wahlang bad ïa ka nam nongapkol ba tbit la ïoh da ka Banrikordor Wahlang kiba dei jong ka Jakrem Sports Club.
Ym tangkata, ka MDSA ha kane ka sngi ka la ïoh ruh ban pynkup burom ïa ki ‘thei ïalehkai phutbol jong ka Jakrem Sports Club kiba la wanrah nam wanrah burom ïa ka dong ka thaiñ bad ïa ka distrik baroh kawei hadien ba ka la ïoh ïa ka jingjop ha ka lympung 1st Meghalaya Women State League – 2025.
Ïa kane ka lympung ïalehkai jong ka Inter Office Football Tournament bad Women League Football Tournament la wan ban pynhap pyrda da u bah Renikton Lyngdoh Tongkhar uba dei u MLA jong ka Mawkyrwat Constituency ha ryngkat ka jingdon lang ki nongkitkam ka MDSA lem bad kiwei de ki ‘riew rangbah.
