SHILLONG, Kyllayngkot 06: Ka Lagan 2.0 bad ka Cluster CC ki la jop ïa la ki jong ki jingïalehkai ha ka lympung Shillong Cricket League 2nd Division 2026 ba la pynïaid da ka Shillong Cricket Association kiba la long hynne ka sngi Ba-ar.
Ka Lagan 2.0 ka la khur ïa ka jingjop hadien ba ka la pynliem noh da 10 ron ïa ka Metallica Rising, katba ka Cluster CC ka la jop da 52 ron ïa ka Sanmer.
Hadien ba jop ïa ka jingkynting pisa (toss) ka Lagan 2.0 ka la lah ban kamai 164 ron bad hap 7 wiket haduh kaba kut jong ka 20 ober ba la mang. Kiba la kamai bun ron ki long u Sameer Dhanraj (33 ron naki 12 bol) bad u Anuj Kumar (25 ron naki 20 bol).
Haba wan ban beh ïa ka thong ka Metallica Rising ka la shah pynhap baroh 10 ngut ki nongtied tang na ka bynta 154 ron haki 19.1 ober. Watla u Rajiv Thakuri (44 ron naki 24 bol) bad u Babul Doley (31 ron naki 20 bol) ki la kyrshan borbah ha ka tied hynrei ka jinghap kloi ki wiket ka la pynlong ïa ka kynhun ban dang sahdien sa 10 ron ban poi sha ka thong.
Ki rangkawang bol jong ka Lagan 2.0 kiba la tyngshaiñ ki long u Aniket Kumar (2/18 naki 3.1 ober) bad u Santosh Kumar Rai (1/31 naki 4 ober), hynrei ïa ka khusnam Player of the Match la khur da u Anuj Kumar hadien ba kamai 25 ron ha ka pali tied bad khur shi (1) wiket ha ka boling.
Ka jingïalehkai ba bud la ïohi ïa ka Cluster CC kaba la kam trai ban tied nyngkong hadien ba jop ïa ka jingkynting pisa (toss), bad ka la tied pyndep ïa ka 20 ober ha ka jingduh noh 8 wiket ban buh ïa ka thong kaba 199 ron. U Md Sameer u la lamkhmat ha ka tied da kaba kamai 56 ron naki 36 bol, katba u Basant Chettri u la noh synñiang 46 ron naki 21 bol.
Kiba la kham seisoh ha ka boling na ka Sanmer ki long u Marken R Kharkongor (khur 3/26 naki 4 ober) bad u Hubert Shanpru (2/31 naki 3 ober) hynrei ka kynhun kam shym la lah satia ban jubab ïa ka thong haba wan ban tied. Ka Sanmer ka la shah pynkut noh da tang 147/9 haki 17.3 ober.
U Azad Qureshi u la long u namtam ha ka boling na ka bynta ka Cluster CC hadien ba u la khur 4 wiket tang haki 3.3 ober, nalor kata u la ailad tang 18 ron.
