Dang phet rieh u Waheh Shnong ka Wahsarang na kti ki pulit halor ka jingjia kaba la mih ka jingïap briew bad mynsaw

Khliehriat kyllalyngkot 04 : Halor ka jingjia kaba la jia myn ha ka 25 tarik u bnai nohprah 2025 ha shnong Wahsarang East Jaiñtia Hills District ha kaba ka la don ka jingia kajia haduh ba la mih ka jingiamynsaw bad jingkhlad noh u bah Milas Khaii bad halor kane ka tnat pulit ka la ioh pdiang ruh bun tylli ki ejahar, shuh shuh na ka liang u Superintendent of Police East Jaiñtia Hills District, u Vikash Kumar, IPS u la ong ba u Waheh Shnong ka Wahsarang u dang phet rieh bad ki pulit ki dang wad bad thwet ban kem ïa u.
Ki khubor pulit ki iathuh ruh ba myn ha ka 25 tarik u bnai nohprah 2025 ha ka por kumba 9.30 mynmiet, ka kynhun ba la lamkhmat da u Waheh Shnong Wahsarang ka la leit sha ka ïing jong u (L) Milas Khaii bad ki la pyrshang ban wad ïa uwei u briew uba kyrteng u Jur Tlang namar ba u la khot ïa u Waheh Shnong bad byrngem ïa u kumta ka kynhun ka la suba ba u Jur Tlang u don ha kateika ïing jong u Milas Khaii lem bad uwei pat u Kamelus Khaii, la ong ba ka la don ka jingiasngewthuh bakla hapdeng kitei ki khynhun kiba na baroh ar liang ha kaba ki la don ruh ki briew kiba na ka kynhun ba lam khmat da u Waheh Shnong, u bah Pius Khaii bad u Tali Lamo ki la shoh la dat da u dieng ïa u bah Kamelus Khaii bad ïa u (L) Milas Khaii bad ha kane ka jingjia ka la mih ka jingia mynsaw bad la rah ïa kiba mynsaw sha hospital da kiba ha ïing bad hadien kane la pyllait noh ïa ki na hospital.
La ong ruh ba dei ha ka 27 tarik la ioh pdiang ïa ka ejahar na u Waheh Shnong Wahsarang bad na ki briew kiba na Wahsarang kiba la buh ejahar pyrshah ïa u bah Jur Tlang ba la kynnoh ba u bah Jur Tlang u la byrngem byrsit ïa u Waheh Shnong Wahsarang bad na ka liang u Waheh Shnong pat u la ong ba u kwah ban iakren shwa halor ka jingjia ba la jia hapdeng jong u bad u bah Jur Tlang khnang ban dup sngewthuh ba halor kaei ka daw ba u Jur Tlang u la byrngem byrsit ïa u Waheh Shnong bad ban tip ruh ba mano ba la pynshit haduh ban da mih ka jingbyrngem byrsit, kumta ka la don ka jingiakren hapdeng ki ar kynhun.
Hynrei pat ha ka 30 tarik Nohprah ka tnat pulit ka la ioh pdiang ïa ka ejahar na ka kong Chinda Bareh ha kaba iadei bad kane ka jingjia kaba la jia naduh ka 25 tarik ha kaba u mama uba tip kyrteng kum u Kamelus Khaii bad u kpa u bah Milas Khaii ki la shah shoh shah dat da ki dieng bad da ki miej rit bad ki la mynsaw bad ki la thiah sumar ha hospital, hynrei ha ka 31 tarik baroh ar kynhun ki la wan sha ka jingiasngewthuh jingmut bad ki la iasuk bad weng noh ïa ki ejahar,
Hynrei ha ka step jong ka 1 tarik u kyllalyngkot ha ka por kumba 5 baje mynstep la ong ba u Milas Khaii u la khlad noh, kumta ka tnat pulit ka la phah ïa u SI bad ki nongtrei ban pyndep ïa kaba donkam, ha kane hi ka sngi jong ka 1 tarik kyllalyngkot la iohpdaing biang sa kawei ka ejahar na u bah Pas Khaii bad ka register ïa ka ejahar ha Khliehriat Police Station case No. 01(01)/2026 u/s 105/3(5) BNS.