Ban nym shah thombor ki khunlung khynnah, ai jinghikai ki Pulit Ri Bhoi halor ka POCSO Act ha Umrang Umjaren

Nongpoh, K’lyngkot 04: Da ka jingïatrei lang ki Pulit ka Ri Bhoi bad ka Dorbar Shnong Umrang Umjaren ka la long ka jingmynoi ïa kiba bun ki nongshong shnong ka ShnongUmrang Unmjaren ha kaba ha ka sngi Saitjain ki la pynlong da ka prokram kyrpang ban ai jinghikai sha ki nongshong shnong halor ki kyndon ain bapher bapher bad khmtam ban wan rah ïa ka shongsuk ka shongsain hapoh ki shnong ki thaw.
Ïa kane ka prokram ai jinghikai la pynlong hapoh ka Shnong Umrang Umjaren ba hap ha Nongpoh Police Station, ha kaba la sakhi ba ki samla, ki longkmie ki longkpa ki la wan ban shim bynta ban sngap ïa ki lad ai jinghikai da ki Pulit ophisar ka Ri Bhoi.
La sakhi lang ruh ha kane ka sngi da ka jingdon lang u Rangbah shnong ka Shnong Umrang Umjaren u Bah Bonifast Ramde, u Secretary ka Synjuk ki Rangbah Shnong Umrang Area u Bah Bistocan Timung lem bad kiwei kiwei ki nongïalam Shnong bad ki riew rangbah katei ka thaiñ.
Ki Pulit ophisar ka Ri Bhoi ba kynthup ïa u Bah S. Lyngdoh kum u Inspector of Police, ka Kong W. Khongsit kum ka second In-charge ka Umsning Police Station bad u Bah A.Ramde kum u Sub Inspector ki la shim ïa ka bynta ban ai jinghikai ïa ki paidbah nongshong shnnong halor shibun ki aiñ ba kum ki nongshong shnong ki dei ban tip bad ban nym pynkheiñ ïa ki aiñ kiba long na ka bynta ka shongsuk ka shongsain bad ka roi ka par jong ki shnong ki thaw.
Ki aiñ kiba la kham ban khia ha kane ka prokram ai jinghikai bad ba la ai jinghikai bniah sha ki nongshnong ki kynthup ïa ka aiñ POCSO Act bad ka NDPS Act ba na ka liang ki Pulit ophisar ki la batai bniah sha ki nongshong shnong ba ki hap ban tip ïa kitei ki aiñ ba la wan rah da ka sorkar.
Lyngba jong kane ka prokram ai jinghikai ba la wan rah ha kane ka shnong, ka la long ruh ka jingmyntoi ïa ki nongshong shnong ba kin tp kham bha shaphang ka POCSO Act, kaba dei ka ain kaba tehlakam ïa kino kino kiba thombor ïa ki khyllung ki khynnah bad ruh ka NDPS Act, kaba dei ka aiñ kaba ïa khun pyrshah shaphang ki kam khaïi drok beaiñ.