Da ka tamasa bam tynrai pynlong ka CE Society Umsawnongbri kum ka jingpynkhreh ïa ka Jubilee Rupa

Nongpoh, K’lyngkot 03: Kum ka jingpykhreh ban rakhe ïa ka jingdap 25 snem ka jingïad lynti ka CE Society ka Balang Presbyterian Umsawnongbri bad ruh ban pynmih pisa na ka bynta ki jingdonkam ka Society, ka CE Society ka Balang Presbyterian Umsawnongbri mynta ka sngi ka la pynlong da ka tamasa bam tynrai kaba shi sngi na ka bynta ban pynurlong ïa kitei ki jingdonkam bad ki jingangnud jong ka Society.
` Ha kane ka Tamasa bam tynrai la shim bynta shitrhem da ki khun samla kiba la wan rah ïa ki jaid jingbam bapher bapher hapoh kane ka Tamasa bad la pynshongshit ruh da ka jingshim bynta lang ki Longkmie ki longkpa, ki samla bad ki nongïalam ka Balang Presbyterian Umsawnogbri.
Ha kane ka tamasa la lah ruh ban pynpaw paidbah ïa ki jaid jingbam tynrai bapher bapher, ki soh ki pai, ki jhur ki jhep bad kiwei kiwei de ki jingbam tynrai, ha kaba kane ka tamasa ka la khring ïa kiba bun ki nongshong shnong ka Shnong Umsawnongbri bad na ki shnong ba marjan.
La plie paidbah ruh ïa kane ka tamasa da u Tbn. R.R Pamshong kum u kongsan ha ryngkat ka jingdon lang ki nongïalam ka CE Soceity, ki nongïalam Balang bad ki longkmie ki Longkpa jong ka Balang. Ïa ka jingïalang la pynïaid da u President ka CE Society u Samla Riphangsngi Mawphniang.
Haba kren ha kane ka sngi, u Tbn. R.R Pamshong u la ai khublei kyrpang ïa ki khun samla kiba la pynlong ïa kane ka tamasa bam tynrai halor ka jingangnud ban pynurlong na ka bynta ka jingpykhreh ïa ka jingrakhe dap 25 snem ka Society ha u snem 2027 bad ruh ban pynmih pisa na ka bynta ban bteng ïa ki kam shakri ha ki kam jong U Blei.
U la ong ruh ba kane ka tamasa ka dei ban don ka jingmut ba ki jingbam ba pynïaid iew hangne ki dei ban long ki jingbam kiba tei ïa ka met bad ym ban die da kiwei pat ki jaid jingbam kiba pyntroin ïa ka koit ka khiah.
“Kiba bun ki pynlong ïa ki tamasa na ka bynta kiwei kiwei ki kam jong ka pyrthei, hynrei kane ka tamasa ba la pynlong ka long ban pynnmih pisa na ka bynta ka kam ka jong u Blei, ba kum ki samla ki dei ban long kiba shirhem ha kaba shakri ïa ka kam ka jong u Blei bad ym na ka bynta ki kam jong kane ka pyrthei” ong u Tbn. R.R Pamshong.
Shuh shuh, u la ai ruh ka jingkyrkhu ïa ka CE Society bad ruh ïa ki khun samla ba kin dang lah ban ai ka jingshakri kaba bha tam haka kam ka jong U Blei bad u kyrmen skhem ruh ba ka jingpynkhreh ïa ka jingrakhe ïa ka Jubilee Rupa kan long kaba ïaid beit ïaid ryntih bad kaba long ruh ka burom kaba ngi ai ai sha U Blei kum kita kiba shakri bad kiba mane ïa u Blei, u la bynrap.